Nunez-a khelh danah Klopp a lawm

Liverpool boss Jurgen Klopp chuan a striker thar Darwin Nunez a fak a, Uruguayan striker hian RB Leipzig nen friendly match an khelhah goal li a khung - Reds hian 5-0 in hnehna an chang.

Pre-season tour nei mek Liverpool hian Germany-ah Leipzig an hmachhawn a, Red Bull Arena-a inkhelah Mohamed Salah chuan goal hmahruai a khung - a bak goal li erawh Nunez-a khung a ni a, goal khat hi penalty aṭanga a chhuih luh a ni.

Nunez hian Reds hi pound maktaduai 64-in a zawm a, a khelh ṭhat dan a zira a man hi pound maktaduai 85-a la sang chho leh thei tur a ni. Mahse, RB Leipzig an hmachhawn hmaa an match hmasa pahnihah goal a khung lo a, sawisel a tawk nasa hle.

Kum 23 mi striker-in a hunah tak amah sawiseltute goal hmangin a chhanglet a, coach Jurgen Klopp chu a lawm ber zinga mi a ni. German coach chuan, "Sawiselna zawng zawng tihrehna ṭha ber chu tuna a goal khung dan hi a ni.

"Player tana sum tam tak kan sen hian pressure nei lo turah kan ngai fo ṭhin a, mihring ve tho an nih laiin thawklehkhatan an thiltih hote thlengin kan khel zui ṭhin.

"Kan striker neihte leh lo neih tawh ṭhinte nen an khelh dan a inang lo a, mahse, striker ṭha tak erawh a ni. A tan chuan zan duhawm a ni," tiin a player-in goal li a khung chu a lawmpui thu a sawi.

Liverpool hian an pre-season tour match hmasa bera Manchester United (4-0) an ngam loh hnuin Crystal Palace (2-0) leh RB Leipzig (5-0) an hneh leh tawh a, Nilaini zan dar 11:30-ah Red Bull Salzburg an hmachhawn leh ang.

Salzburg, Austria aṭang hian England-ah kirin, July 30, zan dar 9:30-ah Manchester City nen Community Shield an khel dawn a, July 31, zanah French club Strasbourg nen friendly match khelin, August 6, tlai dar 5:00-ah Fulham lenchilhin season thara an league match hmasa ber an khel dawn a ni.