Lingard-a'n Nottingham Forest a zawm!

Manchester United-a a contract hmang zotu Jesse Lingard chuan rin loh takin Nottingham Forest a zawm a, Premier League kai thar club hian a contract rei zawng tarlang lo mah se kum khat chhung atan contract a ziak niin khawthlang media-te chuan an sawi.

West Ham, Everton, Leicester City, Tottenham Hotspur leh Newcastle United pawhin lakluh an duh nia an sawi midfielder hian kar khatah £200,000 deuhthaw a hlawh dawn niin khawthlang media-te chuan an tarlang a, Big Six club player ni lo zinga English top flight league-a hlawh hnem ber a ni dawn.

Nottingham hian nipui transfer-ah player 11 zet an lalut tawh a, Lingard hma hian player langsar zingah Union Berlin striker Taiwo Awoniyi, Bayern Munich full back Omar Richards leh Liverpool right back Neco Williams te an lalut tawh a, Manchester United aṭangin keeper Dean Henderson chu season khat chhung atan loan-in an hawh tawh bawk.

Kum 29 mi Lingard duhtu zingah West Ham an langsar a, David Moyes-a enkawl team hian kar khat hlawh atana a phut zat £180,000 chu ngam chiah lo mah se £150,000 vel hlawhtir an inhuam a, thlem thluk theih an inbeisei.

Hammers-ah hian Lingard hi kal se chuan an player hlawh hnem ber a ni dawn tihna a ni a, khawthlang media-te chuan dressing room lama boruak ṭha lo awm thei pawh hre sa chungin Hammers hian lakluh an inhuam niin an sawi hial.

Mahse, Lingard-a'n Forest-a khelh a thlang ta zawk a, a tihfuh leh fuh loh chu hunin a la hril ang - United aṭanga Hammers-a loan hmanga a khelh lai khan match 16 khelin goal kua a khung a, assist vawi nga a nei a, match 16-ah hian bul a ṭan vek.

England tan vawi 32 inlana goal ruk khung thei hi a hming lo chher tawhna club-ah a kir leh mai rinna pawh a lian viau a, mahse, Forest-in rin loh taka a hlawh phut zat pek an inhuam avangin Premier League kai thar tan a khel dawn ta.

Manchester United academy chhuak Lingard hian Leicester City, Birmingham City, Brighton & Hove Albion , Derby County leh Hammers-ah te loan-in hun a lo hmang tawh a, a nghetin club dang a la zawm ngai lo.

Premier League 2014-15 season-ah khan United tana a match hmasa ber a khel a, Red Devils-ah hian match 231 khela goal 35 khungin assist vawi 21 a nei a, FA Cup, League Cup, FA Community Shield leh Europa League-ah te vawi khat ṭheuh a champion pui.

Forest tana jersey number 10 ha tur Lingard hi beisei angin Old Trafford-ah hlawhtling lo mah se, West Ham-a loan-a hun a hman chhungin a theihna hmuh turin a awm a, free transfer-a lakluh theih a nih bawk avangin Premier League club-ten an inchuh hi a awm lo hran lo.

Lingard hian season hman zawh takah khan United tan match 22 khelin goal hnih a khung a, assist vawi khat a nei - match liah chiah bul a ṭan tih erawh hriat a ṭha.