Arsenal defender thar Zinchenko

Oleksandr Zinchenko chuan Arsenal a zawm fel, pound maktaduai 32 man niin a contract rei zawng hi hun rei tak chhung tia ziah a ni, khawthlang media-te chuan kum li chhung atan inremna an ziak niin an tarlang.

Manchester City tana season thar inbuatsaihna an neihna hmun aṭangin Arsenal hi a zawm. United States-ah hian Arsenal pawhin pre-season an hmang ve tho, manager Mikel Arteta chuan a player thar hi a inkhelh tir nghal.

Player pangana
Nipui bazarah Arteta-a'n an player mamawh zawng a la khawm - Zinchenko an neih chiah khan tun bazar chhunga player panga an lakluhna chiah a ni. Manchester City aṭang bawkin Brazil striker Gabriel Jesus an lo la tawh bawk.

Man City player pahnih bakah hian Fabio Vieira, goalkeeper Matt Turner leh Marquinhos te an lalut tawh a, tunah hian Leicester midfielder Youri Tielemans an la beisei mek bawk a ni, inbiakna erawh thui tak kalpui a la ni chiah lo.

Season hmasa khan Arsenal hi Premier Lesgue-ah pangana an ni a, palina dinhmuna ding thei an nih hnuah chesualin Tottenham hnuaiah an awm leh ta zawk, season tharah chuan Champions League khelh phak an tum ang.

Hriatchian sa
Chelsea lakah Zinchenko hian inkhel bul a ṭan nghal a, minute 45 chhung a khel. Arteta chuan, "A inkhel châk tih ka hria, a tan chuan minute 45 kha a la tawk chiah. A khelh dan tura ka duhthusam chu amah hian a hre sa vek," a ti.

Man City assistant manager a nih laiin Arteta hian Zinchenko hi a lo enkawl tawh ṭhin a, an duhdan an inhre sa. Tlarhnung vei lam sirah Kieran Tierney nen khelhna hmun an inchuh dawn, a ṭha zawnga inelna hian rah ṭha a chhuah a rinawm.

Zinchenko hian Man City tan Premier League leh League Cup nomawi vawi li ve ve a chawi tawh. Citizens tan match 128 a khel a, season hmasa khan league match bikah vawi 15 a inlan - kum 25 mi chauh la ni mah se tawnhriat a nei hnem tawh hle.