Hei le, in hmuh châk Haaland chu!

Manchester City striker thar Erling Haaland chuan a club thar tana a match hmasa berah goal a khung nghal a, Borussia Dortmund tan a khelh laia a club hriatchian Bayern Munich lakah 1-0 in a team chu hnehna a chanpui.

Dortmund aṭanga pound maktaduai 51.2-a City zawmtu Haaland hian minute 12-na lekah goal hi a khung a, German champion nena friendly match an khelhah goal dang a luh zui loh avangin 2-1 in City an chak.

Kum 22 mi striker hi US tour-a an match hmasa zawk, Club America nen an inkhelah hliam vangin a inlan thei lo a, City boss Pep Guardiola chuan a striker chuan hun a mamawh thu a lo sawi tawh.

Haaland a dam a, a match hmasa berah Jack Grealish siamsak a khung nghal - Pep-a'n season ṭan hunah hmuh nawn fo a duh ang.

Guardiola chuan, "Goal a khung nghal a, hei hi a pawimawh hle. Zanina a goal khung ang kha chuan a ti fo a, a hunah tak, a hmunah tak a lo awm ṭhin. Kar liam taa a harsatnate hian eng ang takin nge a tihbuai zel dawn kan thlir ang.

"Kan haw hunah pawh match kan khelh hmain kar khat deuhthaw inbuatsaihna kan nei thei zel dawn a, kar hnih thum chhungin a ṭhat dan ber kan hmu thuai ang," a ti a, a striker a ringtawk hle.

City leh Bayern inkhel hi NFL team Green Bay Packers khelmualah khelh a ni a, US-a stadium ropui ber pawl Lambeau Field-a football match khelh hmasak ber a ni.

Mahse, inkhelh hmain ṭek tla nasa avangin inkhel tihkhawtlai a ngai a, first half-ah tihtawp lailawk a ni a, minute 80 chiah an inkhel bawk.

City hi England lamah an kir zui dawn a, pre-season match khel tawh loin, July 30, Inrinni zan dar 9:30-ah Liverpool nen Community Shield-ah an intum ang.