Bale-a'n goal a khung

Gareth Bale chuan Major League Soccer club Los Angeles FC a zawm hnuah a club thar tana a goal hmasa ber a khung a, Sporting Kansas City lakah 2-0 in a team hi hnehna a chanpui.

Kum 33 mi forward hian kar hmasa khan LAFC tana a match hmasa ber a khel a, a match hnihnaah goal a khung nghal - Real Madrid forward hlui hian a thiam a la theihnghilh lo.

Los Angeles club tan hian Cristian Arrango chuan goal hmahruai a khung a, hun tawp nan minute sarih a la awm tihin Bale chuan chakna nemnghehna goal a khung.

Khawvela footballer man to ber pawh lo ni tawh Bale chuan, "A pawimawh ber chu hnehna kan chang hi a ni a, bench aṭanga luh hnua club tana goal khung a, point thum hlawhchhuahpui chu a nuam hle.

"Mimal thlirna aṭang chuan goal ka khung thei hi a lawmawm a, chu aia lawmawm lehzual erawh point thum kan hlawh thei hi a ni," a ti.

Bale chuan, "Thil inthlak danglam hi chu ka beisei dan sa a ni a, ka fitness pawh a zia chho a, club pawhin hmanhmawh taka min tur loin, hma ka sawn theih nan min pui ṭha hle a ni.

"Training kan neihin hma ka sawn zelin ka hria a, zaninah goal ka khung thei hi ka lawm hle," a ti - Bale-a goal khung hi ama bul ṭan aṭanga lut a ni a, striker Cristian Arango nen ball an inpek kual hnuah a khung a ni.

LAFC hian MLS Western Conference-ah hma an hruai mek a, Qatar World Cup khel tura inbuatsaih mek Bale hoin hmalam pan zel an tum ang.

Champions League-a champion nomawi vawi nga chawi thei Bale hian season hman zawh takah khan Real Madrid-a a contract chu a hmang zo a, LAFC hi free transfer-in a zawm - season khat atan contract a ziak a, kum 2024 thleng pawhsei theih a ni.