Kan inpeih hman lo mai thei - Tuchel

Arsenal lakah Chelsea 4-0 in an tlawm a, inkhelh banah Blues manager Thomas Tuchel chuan a naute inpekna a sang tawk loah a ngai - Premier League season ṭan hmain an inpeih hman dawn em, tih a sawi chiang ngam lo.

Nimin zing khan Camping World Stadium, Orlando-ah inkhel en turin fans 63,811 zet an pungkhawm. Gunners tan Gabriel Jesus, Martin Odegaard, Bukayo Saka leh Albert Sambi Lokonga ten goal khat ṭheuh an khung.

Chelsea hian goal li an chhuah a ni satliah lo - Arsenal lamin inkhel an thunun hneh viau a, goal li chauh an chhuah kha an vannei viau. Tuchel tan result chauh ni loin, a naute khelh dan kha lawm lohna tham a ni.

Tuchel chuan, "A awlsam zawnga sawi chuan kan la ṭha tawk lo, midang el turin kan la ṭha tawk lo, chuvangin hahchawl hman pawh kan ni lo. A pawi ber lai chu kan inpekna a sang lo, Arsenal khan hnehna chan phu zawkin an bei tih kan hmu.

"Anni chuan Premier League bul an ṭan dan tur angin inkhel bul an ṭan thei tawh, ka hmuh dan chuan an inpeih thawkhat tawh viau niin ka hria," tiin an khingpui Gunners a fak, a rilru tak a sawi em tih erawh hriat a ni lo.

Qatar World Cup a awm dawn avangin Premier League season thar bul an ṭan hma dawn. August thla chawlhkar hnihnaa an ṭan ṭhin kha, kuminah chuan kar hmasa ber tawpah an ṭan dawn - inbuatsaih nan kar hnih hun an la nei tihna a ni.

Chelsea manager Tuchel chuan, "Kan ṭhat dan berin kan la inrem lo tih erawh hriat a ṭha, chutih rualin hmun ṭhenkhata kan chet dan kha chuan rilru a tinuam lo. Kar hnih hun kan la neihah hian kan inpeih hman ngei dawn em, tih ka sawi chiang ngam lo," a ti.

United States-a pre season an hmannaah Chelsea hi an che ṭha vak lo. Mexican club Club America 2-1 in an hneh hram a, Major League Soccer club Charlotte FC chu penalty shootout-ah an ngam lo tawh bawk.

Nipui bazar chhungin striker Romelu Lukaku leh defender pahnih Antonio Rudiger leh Andreas Christensen te an chhuak a, forward Raheem Sterling leh centre-back Kalidou Koulibaly te an lalut thung - insiamrem tur chuan hun an la mamawh deuh dawn niin a lang.