'Risk' la huai Laporta a hlawhtling ang em?
Thla hmasa lawka Barcelona chanchin leh vawiina an chanchin chu inang lo tak a ni. Thla hmasa khan club economic vice-president Eduard Romeu chuan Barcelona chhanhim tura euro maktaduai 500 a mamawh thu a sawi.
Mahse, a thusawi aṭangin kar ruk a liam hman chauh a, European club zinga transfer bazar-a che na bera chhal ngam chu Barca an ni a, duhtawk mai an la tum lo - pa pakhat contract bill la ang mai an ni a, inren an tum lo!
Catalan club hian Bayern Munich aṭanga Robert Lewandowski leh Leeds United aṭanga Raphinha lakluh nan dollar maktaduai 100 dawn an seng tawh a, AC Milan midfielder Franck Kessie leh Chelsea defender Andreas Christensen te chu free transfer-in an lalut tawh bawk.
A la tawp lo - Barcelona hian Chelsea rim lai Sevilla centre back Jules Kounde chu lak khalh an tum a, Manchester City midfielder Bernardo Silva an rim mek bawk a, an sum sen huai dan hi mak tak a ni.
Sum tuakna
June 16 khan Barcelona chuan Camp Nou-ah general assembly an nei a, Barca neitu club member-te chuan club president Laporta chu a duh ang taka sum tuak thei turin zalenna an pe - hei hi economic lever an ti a, rang taka sum tam tham tak lakluh dan an ngaihtuah.
Barcelona hian a hmasa ber atan domestic television rights-a 10% share chu kum 25 chhung atan US investment fund Sixth Street hnenah an hralh a, an hralhna zat pound maktaduai 200 chu an dawng nghal.
Catalan club hian Zirtawpni khan Sixth Street hnenah hian television rights 15% an hralh belh leh a, heta ṭang hian £300mtd an dawng leh dawn bawk. Barca hian club Licensing and Merchandising company-a share 49.9% chu hralh an la tum bawk.
Barcelona hian an tum anga BLM share an hralh theih bawk chuan a tlem berah £600mtd chu an lalut thei dawn tihna a ni a, Catalan club hian tun hun atan an hma hun an 'risk' a ni ber mai!
Tun hun
Barca president chhuak ta Josep Maria Bartomeu-a'n sum hman dan chintawk a hre lo a, a duh apiang a lalut a, hlawh uchuak tak tak a pe a, dinhmun chhe takah Barca an din phah.
Laporta hian club sum sen uchuak tak tiboin, hlawh tam uchuak a tihniam ang a, man to taka player lalut loin academy lam a hawi ang a, zawi muangin club hi a dinthar tura ngaihna a awm.
Mahse, 2003-10 inkara Barca President lo ni tawh hian tuna hlawhtlin a duh a, khuarei a nghak hman lo - youth system din ṭhat a, a hun liam tawh hnua Barca hlawhtlin lai thlir a châk lo.
Laporta hian tuna chawimawi hlawh a duh a, tuna champion a châk - kum thum chhunga Copa del Rey nomawi bak chawi nei lo Barca hi hlawhtling leh ngei turin a duh a, chumi atana khuarei nghah kher a ṭulna a hre lo a, 'risk' a la.
A fuh ang em?
Barcelona-in sum an neih theih nan European club lian tam zawkin an tih duh loh tur an ti a, mahse, an hlawhtling ngei ngei ang, tih erawh sawi ngam a ni lo - an player lakluhte hi che fuh lo ve thei tho an ni.
Mahse, hlauhthawnna nena an thlir lai takin Raphinha chuan Real Madrid lakah goal a khung a, pre-season match-ah an hmelma club an hneh avangin an hlim khawp ang. Leeds aṭanga lakluh Raphinha hian 6-0 a Inter Miami an sawp ṭumin goal a khung tawh bawk a, Barca a pan hnua match hnih a khelhah goal a khung ve ve tihna a ni.
Thla thara kum 34 tling tawh tur Lewy pawh Real lakah a inlan a, goal a khung lo thung. Mahse, Polish striker hi season hmasa lawka goal 50 khungtu kha a ni a, Catalan club-ah a hlawhchham thut a rinawm lo.
Barcelona hian Juventus (July 27), New York Red Bulls (July 31) leh Pumas UNAM (August 7) te chu pre-season match-ah an la hmachhawn leh ang a, August 13 zanah Rayo Vallecano mikhualin season thara an league match hmasa ber an khel ang.
Chinfel a ngai
Barca tan player thar zingah Kessie leh defender Christensen pawh eng ang takin nge an khelh chhuah dawn, season thar ṭan a nih phawt loh chuan sawi theih a ni lo a, beiseina nen fan-ten an thlir ang.
Heng aia chinfel ngai hmasa erawh Barcelona-in player chhuahtir ngai an nei nual a, an chhuak duh vek kher ang em, tih erawh zawhna awm thei tak a ni thung.
Xavi-a'n a ruahmannaah Memphis Depay, Martin Braithwaite, Miralem Pjanic leh Samuel Umtiti te a telh lo a, player hlawh hnem, ṭhenkhat phei chu contract la nei rei tak an ni hlawm a, an hlawh thlahlela chhuak duh lo an awm mai thei.
Barca hian an midfielder Frenkie de Jong pawh Manchester United hnenah hralh an rem ti tawh a, mahse, a hlawh an bat ṭhensak midfielder hian chhuah a duh tlat lo - Europa League khel tur club-a kal a châk lo a, a hlawh chinfel a duh bawk.
Buaina a tam!
Barcelona hian forward Ousmane Dembele pawh chhuak tur angin sawi awm reng mah se, kum hnih atan contract thar an ziahpui a, French forward inhliam ngun ve tak hian hliam a pumpelh thei ang em, tih chu zawhna lian tak a ni.
Rawlthar player ṭha Pedri, Gavi leh Ansu Fati te theihna sanzia inhrilh nawn a ngai lo a, mahse, rawlthar tam tak an lo thamral tawh ṭhin tih hretute tho kha kan ni - eng tak ang zel ang maw, tiin Barca fan-te an inzawtchiang mek.
Xavi-a'n Christensen a nei tawh a, a beisei mek Kounde hi lalut thei ta pawh ni se, Spanish coach tawnhriat ngah lo tak hian tlarhnung buaina a chingfel thei ang em, tih chu zawhna a ni bawk.
A tawi zawnga sawi chuan chinfel ngai tam tak a la awm a, Bayern boss Julian Nagelsmann-a'n, "Khawvel club zingah Barca hi pawisa nei loa player lei thei awmchhun an ni," a tih club hian an risk lak a fuh tawk tih season tharah an lantir a ngai e!