AIFF Constitution thar ngaihtuah dawn

Supreme Court chuan Committee of Administrators (CoA) buatsaih, All India Football Federation constitution chu July 28 hian a ngaihtuah dawn a, hruaitu mumal nei loa awm mek AIFF chuan hruaitu thar an nei thuai thei dawn tihna a ni.

India hian FIFA Under-17 Women's World Cup chu October hian a thleng dawn a, India-in he inelna hi harsatna awm loa a thlen ngei theih nan sorkar laipui chuan hma a la a, AIFF buaina pawh hi ngaihtuah hmasakah a awm theih dawn phah niin a lang.

FIFA U-17 Women's World Cup hi Bhubaneswar (Odisha), Margao (Goa) leh Navi Mumbai (Maharashtra) ah te khelh tura ruahman a ni a, India, Japan, Spain, Germany, Mexico, Canada, Brazil, New Zealand, USA, Nigeria, France, China, Colombia, Chile, Morocco leh Tanzania ten inelna an hmachhawn ang - inelna hi October 11-ah khelh ṭan a ni dawn a, October 30 thleng awh tur a ni.

AIFF constitution thar duangtu CoA hi Supreme Court-in an ruat an ni a, Justice (retired) Anil R Dave, Chief Election Commissioner of India hlui Dr SY Quraishi leh India captain hlui Bhaskar Ganguly te an ni - anni hi hun engemaw chen chu State FA lam aiawhte nen an thu a inhmu thei lo a, SC lamah constitution ruahman chhin erawh thehluh a ni ta tho a ni.

AIFF general secretary lailawk Sunando Dhar chuan, "Indawrna hrang hrang kalpui a nih hnuah AIFF constitution duan chhin chu thehluh a ni ta a, he hun kan thlen theih nana tha thawhtute zawng zawng ka lawmpui takzet. Constitution thar nen Indian football hmasawn nan ke kan pen chhunzawm theih ka beisei a ni," a ti.

Dr Quraishi chuan, "Hun rei tak chhung kan thlir ho hnuah, AIFF constitution chu kan tifel thei dawn ta a, National Sports Code nena inmil thlap, FIFA leh AFC nena inmil bawk si a ni dawn a, heng zawng zawng hian AIFF chu Indian football hmasawnpui turin nasa takin a pui dawn a ni," tiin a sawi.