Arsenal leh Wenger ten bul tan tha dawn

Arsenal manager Arsene Wenger chuan Emitares Sta­dium-ah kum hnih dang cham chhunzawm turin contract thar a ziak. Thawhṭannia Wenger leh club neitu Stan Kroenke ten inbiakna an neih hnuah Thawh­lehni khan club board meeting chuan contract thar chungchang hi an sawi zui a, nimin khan official taka puan chian a ni.

Kum 67-a upa Wenger hian 1996 khan North London club hi a enkawl ṭan a, kuminah Premier League table-ah pangana niin Gunners manager a nih hnua a vawi khat nan season tharah Champions League an khel dawn lo. Champion Chelsea chu point 18 zetin an phak lo a, mahse FA Cup final-ah erawh Blues hi 2-1 a hneh letin nomawi a chawi pui.

Change
French manager Wenger-a'n Arsenal a enkawl ṭan phat aṭang­in danglamna a thlen nghal. Khelmual chhunga hlawhtlinna chang tur chuan a pawn lama inbuatsaihna neih ṭhat a ngai tih a hre chiang a, a bul ṭanna chu training ground a ni.

Wenger an lakluh hma bawr kha chuan Arsenal player zingah zu in an tamin an in ho nasa hle a, training an neih pawhin an taksa an sawizawi bak chu set piece tlem bak an zir ngai meuh lo! Khelmual chhungah result duhthusam an neih theih loh bakah player-te thunun an harsa hle.

University of Strasbourg aṭanga Economics degree nei Wenger-a'n thuneihna a chan hnuah erawh a huhoa zu in a khap nghal. Training hun chung rei lote an neih chu a hlawk thei ang bera an hman theih nan engkim fel takin ruahmanna a siam lawk vek ṭhin.

Hun rei lote chhungin a hnathawh a lang nghal. Season pum hluma Arsenal a kaihhruaina hmasa ber 1997-98 khan Premier League leh FA Cup an chawi kawp nghal, kum li hnuah nomawi pahnih hi a rualin season khat chhungin a la kawp leh bawk - kum 21 hun a hman chhungin league nomawi pathum bakah FA Cup pasarih a chawipui tawh a ni.

Wenger In
Arsenal ṭan tute sawi nuam tih ber pakhat chu "The Invincibles" a ni. Kum 2003-04 season khan Wenger leh a naute hi hneh loh nei loin league champion an ni, Gunners fan-ten he chanchin hi sawi nuam an ti a, mahse hun rei tak thawnthu ngai hlir sawi nawn erawh an peih bik lo.

League nomawi an chawi aṭanga tilte lian dang la leh turin Arsenal hian kum kua ( ni 3,283) zet an nghah a ngai. Hull City hnehin 2014 FA Cup nomawi an chawi a, he inelna bikah hian tun hnai kumli chhungin vawi thum an champion thei.

Manchester United, Manches­ter City leh Chelsea ten league-ah hlawhtlina an chan laiin Gunners an hawihil chho zel. An duh ber nomawi chawi an harsat avangin 'sum hman tur a awm' tia sawi reng chunga player manto lei khat tak Wenger chu dem burah a ṭang chho ta.

Arsenal manager duh lotuten a bik takin tun season chawhnu lam aṭang khan an lungawi lohna nasa takin an lantir ṭhin. Khelmual chhungah banner hmangin Wenger chhuak tura an duhna thu an tarlang deuh reng a, kawng zawhna te neiin; inkhelh laklawh laiin khelmual chungah Thlawhtheihna ''Wenger Out'' tih phurtu thlawhtir a ni fo bawk.

Amaherawhchu, sawiselna leh diriamna tinreng karah Wenger hi a dinna ngaiah a dingnghet tlat. Fans tam zawk amah duhtu an awm reng a, hei bakah club thuneitu lamin Arsenal siam liantu pakhat hi an hnualsuat phal lo.

FA Cup final-a Chelsea an hneh ṭuma "Wenger In" tih banner an tar chu a taka chantirin tunah chuan kum hnih dang a cham chhunzawm leh dawn ta a ni.

Engtin zel?
Arsenal hian Emirates Sta­dium an sak avangin player langsar lakluh nan pawisa an nei lo tih ṭhin a ni a, player hlawhah club dang aia an in sen huai loh bawk avangin lak belh aiin neihsa an kiam ṭhin. Tun hnai season hnih chhung velah erawh an player neihsa an chelh thei a, an lak belh bawk.

Wenger hma hun tih chian a nih ruala sawi zui hlawh nghal chu player thar ni loin an neihsa chelh chungchang a ni. Forward Alexis Sanchez leh playmaker Mesut Ozil ten season khat bak contract an nei tawh lo a, pawtsei tura an sawmna an la pawm lo. Report ṭhenkhata a lan dan chuan heng player pahnihte hi karkhata £300,000 hlawh turin contract zawrh mek an ni.

Nipui transfer lai a ni a, player ṭha la turin sum sen hnem a ngai hle tih chu a chiang. Arsenal hian an player pawimawh pahnih hi an chelh thei lo a nih chuan an hmunruak luah tur zawn hmuh chu hna hautak a tling dawn. Tunah erawh Sanchez leh Ozil te contract chungchang hi thu mai a la ni rih.