100%-in Bale fit lo

Real Madrid forward Gareth Bale chuan Champions League final-a Juventus hmachhawn turin 100% fitness a neih loh thu a sawi.

Kumin final hi Bale-a pianna khua Wales khawpui Cardiff-ah khelh tur a ni a, inkhelh hun hi Inrinni zan dar 12:15 a ni. Amaherawhchu Welsh forward Bale hi April 23-a Barcelona nen an inkhelh ṭuma a chawnah hliam a tawrh avangin bul ṭan lo thei dinhmunah a ding.

Kum 27 mi Bale chuan, "100% fitness ka nei lo a, amaherawhchu bul ṭan tura min tih phawt chuan ka pawm nghal ang," tiin an khawtuala inkhelh a châk thu a sawi.

Real forward Bale chuan a dinhmun sawi chhunzawmin, "Ka ngal rekah zai ka tawk a, ka la dam chiang lo. Training-naah na ka la nei a, inkhel turin na chhawkna ei ka ngai. Zai tawh hrim hrim hian ngai awh a har a, season laklawh lai a nih hian a harsa lehzual," a ti.

Real boss Zinedine Zidane chu Bale nge kum 25 mi Isco-a'n bul ṭan ang tih chungchanga thutlukna siamtu tur a ni. Welsh forward hi pound maktaduai 85 man a ni a, Isco hian match hnuhnung 11-ah goal nga a khung thung.

Kum 44 mi Zidane chuan, "Coach nih chuan thutlukna harsa siam hi chu thil pang­ngai a ni a, player khel ṭha tluang lai thlan theih hi a pawimawh a ni," tiin thutlukna a la siam loh thu sawi thung.