Transfer bazar-ah United an 'che' dawn

League Cup leh Europa League-ah Manchester United an champion a, nipui transfer bazar-ah United hian player langsar pathum emaw pali tal lakluh an tum - Red Devils boss Jose Mou­rinho chuan an executive vice-chairman Ed Woodward-an thla hnih chhung chu 'a player duh­zawng' a thlithlai tawh thu a sawi.

Season thara Champions League khel tur Mourinho-a'n forward leh defense-ah a mamawh player lakluh a tum a, tun dinhmuna United nena sawizawm hlawh pahnih chu Atletico Madrid striker Antoine Griezmann leh Burnley centre-back Michael Keane-te an ni.

Mourinho-a duhthlan

Griezmann leh United sawi­zawm an nihna a rei tawh a, Atle­tico Madrid forward hi a contract-ah euro maktaduai 100-a lei ngam an awm a nih chuan a chhuah theihna dan a awm. Kum 26-a upa forward hian kar hmasa khan United-a zawmna chance chu 'sawmah paruk a ni' tiin a lo sawi tawh.

France international hian United a zawm leh zawm loh chungchanga buaina a neih ber chu Mourinho nauten Champions League an khelh dawn leh dawn lohah a ni. United-in Europa League nomawi chawi chungin Europe-a club inelna sang berah hmun an 'book' a, tunah chuan Griezmann an rim nghal chat a rinawm ta hle - Spanish media-te chuan French forward hian Atletico Madrid hnenah chhuah dilna a thehlut niin an tarlang hial.

United-in Griezmann lalut thei dawn lo pawh nise 'invenna' an nei sa a, Torino forward Andrea Belotti chu Mourinho chil tiputtu zinga mi a ni - kum 23-a upa forward hian tun season Serie A-ah goal 25 a khung a, a chhe lo ang.

Welcome back Keane?

United tlarhnung pawp Mou­rinho-a'n a hmuh hmaih lo a, Burnley centre back Michael Keane chu a mamawh chhanna a nih theih a beisei. Kum 24-a upa defender hi United player hlui a ni a, Louis van Gaal khan Red Devils tan a ṭha tawk loah ngaiin pound maktaduai 2 lekin a hralh.

Mourinho-a'n LVG-a hmuh loh a hmu niin a inngai a, Keane hi Old Trafford lamah hruai kir a duh. United vanneihna chu Keane an hralh lai khan 'Burnley-in Keane an hralh leh chuan 25% sum United kutah a lut ang' tih contract-ah a lo tel hlauh a, Mourinho-a'n a lalut thei dawn a nih chuan 25% a tlawmin an lei thei dawn tihna a ni nghal - Burnley manager Sean Dyche erawhin a player duhlai hralh tur khawpin sum an mamawh loh thu a sawi thung!

United hian Keane an lalut thei lo a nih erawh chuan Benfica centre back Victor Lindelof lam an hawiin a rinawm a, kum 22 leka upa Swedish rawlthar hi January transfer bazar hawn a nih hma khan an lo 'hel' tawh.

Sum nei United?

United-in Champions League khel lo se chu sponsorship leh prize money aṭangin pound maktaduai 50 vel hloh tur an ni a, Europe-a club inelna sang bera an inlan dawn takah chuan players lei nan pound maktaduai 50 an nei nghal phawt tihna a ni - sum lama an buai loh sa tehlul nen!

United hian tun season ṭan dawn khan defender Eric Bailly, midfielder Henrikh Mkhitaryan leh Paul Pogba lakluh nan sum tam tham tak sengin sum an neihzia an 'show' tawh a, tun nipui transfer-ah Mourinho-a'n player pali tal lakluh a duh avangin an insum thut lo ang.

Tun nipui transfer bazar hi ṭum dang zawng aiin sum chevel a tam tura ngaih a ni sa hrim hrim - a chhan ber nia lang chu Premier League TV deal-a pound tluklehdingawn 8.3 zet a awm vang te, Italian club lian Inter Milan leh AC Milan-in sum tam tak sen an inhuam lawk vangte a ni ber.

De Gea chelh tum

United-in player lei an tum rualin buaina tur an nei ve tho a, an players ṭha zawkte chhuak lo tura chelh an ngai. Tun dinhmunah goalkeeper David de Gea chu Real Madrid nen sawizawm an ni leh tawh. Spanish keeper hian 2015 khan Santiago Bernabeu pan turin Real hi inremna a neihpui thlap tawh a, United pawhin a man zat atan pound maktaduai 29 an pawm tawh. Mahse, Spanish club-in transfer tawp hma darkara lehkha pawimawh an thehluh hman loh vang chauhin De Gea a chhuak lo.

Zinedine Zidane-a enkawl Real hian De Gea hi tun nipuiah lakluh an tum leh ngei dawn nia sawi a ni a, United erawh an keeper chhuanvawr chelh turin an inringtawk hle. August 2015-a Real-in an rim lai kha chuan Spanish keeper hian a contract-ah kum khat chiah a nei tawh a, tuna a contract-ah erawh kum 2019 thleng a nei. Kum 26-a upa keeper hi Old Trafford-ah a hlim viau nia sawi a ni bawk.

Hei mai a ni lo, season hman zawh taka United Player of the year Ander Herrera chu Athletic Bilbao lama a pu hlui, Barcelona coach thar Ernesto Valverde chuan Nou Camp lamah lakluh a tum dawn niin an sawi - Spanish club lian hi hnar an har khawp ang.