NBA Finals ; Golden State vs Cleveland

Zirtawpni zing dar 6:30-ah NBA Final Game 1 khelh a ni dawn. Golden State Warriors chuan Oracle Arena, Oakland-ah nomawi kawltu Cleve­land Cavaliers an lo mikhual dawn, best of seven series hmanga chak zawk zawn tur a ni ang.

Golden State Warriors leh Cleveland Cavaliers te hi tun hnai kum thum chhungin final-ah an vawi thum intawnna tur a ni a, vawi khat ve ve hnehna chang tawhin tun ṭumah hian chungnung zawk tur rinthiam harsa khawpa khel ṭha tluang lai an ni.

Kumin NBA playoff chinah Warriors hian match 12 an khelhah hnehna chang fai vekin record thar an siam. Cavs erawh vawi 12 chak ve mah se ṭum khat an tlawm thung.

Team phnihte hi regular season-ah khan vawi hnih an intawng. Cleveland hian an khel­mualah point khat chiaha sang zawk chungin hneh­na an chang a, tun ṭuma an inkhelhna tur Oracle Arena-ah erawh Golden State hian point 35 zetin hnehna an chang thei.

Season hmasa khan Cavs hian NBA-a thil thleng ngai lo an thlentir. Final Game 4 an khelh zawh hnuah Golden State hian 3-1 in hma an hruai a, an nomawi humhim turin match khat bak chak an ngai tawh lo. Mahse, Cavs hian game hnuhnung paliah hnehna chang vekin an champion. NBA Finals-ah game thum hloh hnua hnehna chang let thei hmasa ber an ni.

Durant vs James

Golden State leh Cleve­land-ah hian player langsar kan sawi dawn a nih chuan an team pum sawi a ngai hial ang. Season hmasa aia danglamna lian tak hmuh tur awm erawh Kevin Durant a ni.

Forward Durant hian Oklahoma City Thunder aṭangin Warriors a zawm a, a season hmasa berah final a khel nghal dawn. Durant-a'n Thunder tana a khelh laia a ngam loh LeBron James a hmachhawn leh dawn a ni. Player ropui pahnihte hi 2012 Finals-ah khan an lo intawng tawh a, James hian Miami Heat chu hnehna a chanpui.

Tun ṭumah Durant hian Most Valuable Player nilai Stephen Curry bak­ah Klay Thompson, Dray­mond Green leh Zaza Pachulia te a ṭanpui dawn a, an team-ah player inhliam an neih loh bawk avangin nomawi beiseina an nei sang khawp ang.

Cavs champion pui thei James hian kawppui atan Kyrie Irving a nei, anni pahnih hi playoff chinah chuan player inkawp fuh ber an ni mek - an pahnihin match khata an point hmuh belhkhawm chu chawhrualin 67 zet a ni. Kevin Love leh Tristan Thompson te an la awm bawk avangin nomawi humhim turin inrintawkna an nei sang hle ang tih a chiang.