CYMA Football A thiam 16 hriat kim dawn

CYMA leh MFA ṭang­kawpin an buatsaih TṬ Royte Trophy-ah vawiin hian Round of 32 chu khelh zawh a ni dawn a, Lammualah inkhel pahnih en tur a awm ang.

Chawhma dar 11:00 hian Hualngohmun leh Khatla te an inhmachhawn ang a, darkar khat leh a chanve hnuah Ramhlun Vengthar leh Chhinga Veng te an inkhel ang. Inkhelh pahnih hi Thawhlehnia inkhelh tur a ni a, ruahsur vanga khelh theih a nih tak loh avangin sawn a ni.

Intluk tawk

Vawiin match hmasa ber khel tur Hualngohmun leh Khatla-ah hian chak tur hriat thiam a har a, player neih danah chuan chungnung zawk an awmin a lang lo.

Hualngohmun-in Aizawl khaw pawn team pahnih Hnah­thial Jt YMA leh Dampui an hneh tawh a, an match hnih khelhah hian an player pawi­mawh Mizoram midfielder Lal­­ramtharmawia leh Chhing­a Veng FC midfielder Van­lalthanga ten goal an khung ve ve a, tlarhnungah Mizoram defender Lalhmunmawia (Ahmun­tea) an nei bawk.

Khatla hian an match hma­sa berah Chhimveng, Thingdawl chu 3-2 in an hneh hram a, match hnihnaah erawh team ṭha Venghlui 1-0 in an hneh. Tun hnaiah Khatla hi basketball vangin hming chher mah se tualchhung footballer langsar Michael Lalremruata leh Jesse Laldinpuia te an neih avangin en liam theih an ni lo.

NECS Cup champion

CYMA Football hma chiaha Aizawl district huam chhung veng leh veng inelna NECS Cup champion Chhinga Veng-in Round of 16 an luh tlai chhan hi an khelh hnuhnung vanga ngaih a ni a, Ramhlun Vengtharin upset thlen tur chuan tlarhnung ven thiam a ṭul ang.

Chhinga Veng hian Lal­khawpuimawia, Rochhar­zela, Lalchhuanpuia, Lalthla­muana leh Lalsawmzela te an kawl miau avangin Ṭhiak leh Puilo an hneh ṭuma an goal khung belhkhawmin goal 19 a tling hi a mak lo.

Ramhlun Vengtharin Chhinga Veng hmachhawn thei turin Changzawl leh Zotlang an sawp ve ve a, amaherawhchu ṭha tawh sa ni loa player la ṭha chho thei tur an kawl tam avangin Last 16 lut tur chuan an khelh thiam a ṭul dawn a ni.