Bayern Hall of Fame-ah Lahm

Philipp Lahm-a'n player ni chunga inkhel leh tawh lo turin a ball boot a khâi tawh a, inkhelh a chawlhsan aṭanga chawlhkar hnih pawh a liam hmain a club hmangaih Bayern Munich chuan Hall of Fame-ah an seng lut ta.

Bundesliga champion Bayern Munich hi 27 February, 1900 daih tawha din a ni a, kum 117-a upa a ni tawh tihna a ni. An player zingah Lahm hi Hall of Fame-a an lakluh 17-na chiah a ni. Goalkeeper ropui Oliver Kahn (2088) hnua an lakluh leh hmasak ber chu Lahm hi a ni.

Kum 33-a upa Lahm chuan, "Bayern mi ropuite zinga ka hming a chuang ve ta hi ka lawm hle," a ti. Bayern Munich chairman Karl-Heinz Rummenigge chuan, "Philipp hian a phu, Bayern tan hian kum 22 chhung zet rinawm takin a khel a, hlawhtlinna ropui tak chanpuiin player ṭha bik a nih bakah hruaitu ropui a ni," a ti.

World Cup Goal

June 20 zan dar 6:00 a ni a, Allianz Arena-a mipui 66,000 chuang pungkhawm chu 2006 FIFA World Cup match hmasa ber en chakin an phusa nasa hle. Stadium chhunga ṭhutna zawng zawng deuhthaw chu Germany jersey ha tuten an luah a, an khingpui tur Costa Rica lam fans chu chhiar tham lek an ni.

Inkhel ṭan aṭanga minute rukna lekah mi­pui pungkhawm chu goal lawmin an au chhuak nghal, a khungtu chu Philipp Lahm a ni. Khelmual dinglam sirah Lahm-a'n ball changin midfielder Bastian Schweinsteiger pass tur ang taka awmin Costa Rica defender pahnih a bum a, mawi zetin goal ban leh a kham in tawhna kilah a thlawh lut! He goal hi Lahm chuan "Ka nuna goal hlu ber a ni hial awm e" tiin a sawi a, sawifiahna ṭawngkam dang hman a ngai lo.

A pianna khawpui Munich-ah ngei World Cup goal hmasa ber khung nawm tur zia leh hlimawm tur zia hi a tawngtu nilo tan sawifiah thiam chi a ni lo ang. Kum 2014 World Cup-a an ram a champion pui tluka hun lawmawm dang pawh a awm thei chuang bawk awm lo e - Football nun duhawm hmangtu Lahm chuan May 21, Pathianni zan khan player a nih laia a match hnuhnung ber chu Bayern Munich tan a khel ta a ni.

Munich fapa

Bayern Munich youth team coach Jan Pienta-a'n a naupan lai aṭanga a hual ruk tawh Lahm hi kum 11 mi lek a nih laiin Allianz Arena-ah a seng lut a, naupang lam coach zinga pakhat Hermann Hummels chuan, "Philipp Lahm hian Bundesliga a khel lo a nih chuang midang tu tan pawh hmun a awm bik lo ang," tiin a naupan lai aṭanga mi chungchuang Lahm chanchin a sawi daih tawh.

November 13, 2002 a ni a; Bayern Munich chuan Champions League group stage khel turin Ligue 1 club RC Lens an mikhual, minute 87-naah substitude bench aṭangin kum 19 tling hlim Lahm tlan luhtir a ni. A club tana a senior match hmasa berah chanchin sawi tham a nei lo a, a hnu kum thum chhungin senior team tan a inlan zui tawh miah lo bawk! Legend Lahm-a'n Bayern tana a bulṭan dan hi a ropui bik lo hle.

Kum 2003-2005 chhung VfB Stuttgart tan loan hmanga a khelh hnuah 2005 July khan Bayern Munich-ah lak kir a ni. Lahm hian hliam a neih avangin beisei angin khelmual chhungah hun a hmang tam nghal mai bik lo, 2005-06 season chawhnu lam aṭangin inkhel bul ṭantu zingah a tel tam ṭan a, hemi kum aṭang hian a chawlh thlengin club leh ram tan player pawimawh a ni tluan ta zak a ni.

Zinkawng duhawm

Allianz Arena-ah kum 2010-11 season khan Champions League final khelh a ni a, mualneitu Bayern-in final an lut - an khingpui chu Chelsea an ni; Premier League club hian penalty shootout-ah hnehna an chang, an mualah Bayern ṭantute mittui a far.

Lahm chuan final zawh boruak sawiin, "Blues laka kan chak loh hnu angah kha chuan player-te kha kumkhua a inṭhen darh thei dinhmunah kan ding a, a lehlamah chuan ṭha lehzuala thawhho chhunzawm theih a ni bawk, keini chuan inpumkhat taka awm chhunzawm kan thlang," a ti.

A chawr chhuahna club tan hian kum 2013 May thla khan Champions League final a khel zui leh a, Wembley Stadium-ah Borussia Dortmund 2-1 a hnehin Europe-a club liante inelna sang berah nomawi a chawi.

Bayern fa chuam hian a club tan inelna hrang hrangah match 517 khelin goal 16 a khung a - Bundesliga (8), German Cup (6), League Cup (1), DFL-Supercup (3), Champions League (1), UEFA Super Cup (1) leh FIFA Club World Cup (1) a chawi bawk.

Bayern manager hlui Pep Guardiola chuan, "Bayern hian legend - Franz Becken­bauer, Gerd Muller, Uli Hoeness leh Karl-Heinz Rummenigg te an nei, ka tan chuan Philipp Lahm hi legend a ni. Khelmual chhung­ah leh pawnah min pui nasa a, Bayern captain ni tura mi famkim chu a ni," a ti.

Club tana a hlawhtlin ang bawkin ram tan pawh Lahm hian hun duhthusam a hmang a tih theih. Kum 2014 World Cup-ah khan a captain-na hnuaiah Germany chuan nomawi an chawi, final-ah Argentina nen inkhelin hun pek belh minute 113-naah Mario Gotze-a'n goal awmchhun a khung - South America-a stadium hmingthang ber pakhat Maracana Stadium-ah Lahm chuan nomawi a chawi a, international football a chawlhsan zui bawk.

Hruaitu ropui

German tlangval hi feet 5 leh 7 inches chauh sang a ni a, European player zingah chuan pate zinga chhiar tur a ni. Mahse, a fin em avangin khelmual chhungah chiang takin palian a ni tho. Barcelona-a player ṭha rual a enkawl hnua Bayern coach hna chelhtu Pep Guardiola chuan, "Ka thawhpui tawh zingah a fing ber," tiin a sawi tawh, Spanish manager hian Lahm a dahsang vet vet hle.

Michael Ballack hliam vanga a inkhelh theih loh vangin 2010 World Cup-ah Lahm hian Germany captain arm band a hreng a, international football a chawlhsan thlengin a hreng zui. Germany coach Joachim Low chuan, "Philipp hian pianpui thuneihna a nei a, mawhphrhna a lak ngam bakah midang a thlunzawm ṭha bawk - hruaitu ni tura piang a ni," tiin a fak.