Aizawl veng an ding chang

TṬ Royte Trophy - CYMA Inter Branch YMA Football Tournament-ah nimin khan Salem Veng, Bawngkawn, Durtlang leh College Veng ten an khingpui an hneh. Aizawl pawn team Khawlailung, Kelsih leh Kawnpui Vengthar bakah Aizawl team Luangmual beiseina a tawp.

CYMA Football-ah hian team 14 - ITI Veng, Leitan, Chatlang, Ai­zawl Venglai, Zawlnuam Borai, Lengpui, Ramhlun South, Republic Vengthlang, Chanmari, Republic Veng, Salem Veng, Bawngkawn, Durtlang leh College Veng ten Round of 16 an lut tawh. Last 16 tie draw hi June 2-ah neih tura ruahman a ni a, June 5-8 khian quarterfinal lut tur zawnna neih tur a ni ang.

Salem Veng comeback

Nimin inkhel hmasa berah Salem Vengin inkhel thunun hret mah se Khawlailung lamin goal an khung hmasa zawk a, an thiampuipa Mohun Bagan winger hlui Lalrinfela'n first half tawp hma hretin a khung a; Khawlailungah hian MPL player ṭha. Lalthantluanga (Lalmama) pawh a khel ṭha hle.

Salem Vengin first half-ah tawnhriat nei ṭha ber Joseph Lalnunpuia chu inhliam vangin an chan a, he ti chung hian second half-ah inkhel an la thunun tho. Minute 66-naah R. Lal-ṭhapuia'n nalh zetin box pawn aṭangin Salem Veng si phurh sutna goal a khung a, Mizoram junior team-a midfielder Ṭhapuia hian goal ban a pet per leh bawk. Salem Veng defender David Lalchhuanawma'n minute 82-naah Khawilalung offside trap siam sual hmang ṭangkaiin chakna goal a tauh lut.

Bawngkawn an lian

Bawngkawnin champion rinkai zinga mi an ni tih nem­nghet nan Kelsih 6-0 in an sawp. Kelsih hian ball inpek kual thiam mah se tlarhma player-te an inhriam hleih deuh a ni.

Bawngkawn tan hming langsar MS Dawngliana'n hattrick siamin H. Lalmuankima'n goal hnih a khung a, Lalremsanga'n goal khat a khung bawk.

Durtlang tan Notea

Durtlang leh Luangmual te rinlawk ang ngeiin an intum tawk a, team pahnih danglamna chu DSK Shivajians forward Lalliansanga (Notea) a ni.

MPL4-a Luangmual leh Zo United tana player lang­sar Notea hian minute 36-naah goal awm chhun a khung a, Durtlang goal venhim kawngah Ricky Lallawmawma a ṭangkai hle. Luangmual lamin an sip hurh sut theihna hun ṭha an nei a, amah­erawhchu Lalramzauva leh B. Mal­sawm­zual­a ten an hun ṭha neih an hmang ṭangkai thei lo.

College Veng chak

College Vengin last 16 lut turin inkhel thunun chungin Kawn­pui Vengthar 3-2 in an hneh.

Veteran coach H. Vanlal­thlanga enkawl College Veng hian minute 8-na lekah KC Lalruatkima hmangin hma an hruai a, amaherawhchu Kawnpui Vengthar lamin penalty hmangin minute 15-naa an sut avangin awm nuamin an awm lo.

Chak ngei tumin College Veng lamin Dinthar FC midfielder hlui KC Lalchhuanmawia an luhtir a, goal chance ṭhahnem tak an hlah hnuah minute 64-naah substitute VL Ruatkima'n goal hnihna a khung a, minute 10 pawh tling loah B. Zoramthara'n goal thumna a khung belh leh bawk.

Minute 86-naah Kawnpui beiseina siam turin MPL club Bethlehem VT FC player Van­lalhruaia'n goal khat rawn khung leh mah se goal dang hmuh tur a awm tawh lo.

Nimin Inkhel Results
Khawlailung 1 - 2 Salem Veng
KHA : Lalrinfela 45'
SAL : R. Lalthapuia 66'; David Lalchhuanawma 82'
Kelsih 0 - 6 Bawngkawn
BAW : H Lalmuankima 32', 84'; MS Dawngliana 37',
61', 86'; Lalremsanga 89'
Durtlang 1 - 0 Luangmual
DUR : Lalliansanga 36'
College Veng 3 - 2 Kawnpui Vengthar
COL : KC Lalruatkima 8'; VL Ruatkima 64'; B. Zoramthara 73'
KAW : Vanlalhruaia 15', 86'