Number 1 Murray a buai lo

Andy Murray-a'n French Open first round paltlang turin harsatna a tawk lo. World number 1 hian Thawhlehni zan khan Andrey Kuznetsov chu 6-4, 4-6, 6-2, 6-0 a hnehin second round a inhlangkai.

Philippe Chartier Court-a inkhelah Murray hian darkar hnih leh minute 32 chhungin aces vawi hnih chiah siam mah se a service ṭum li chiah a hloh a, a khingpui service chhuhsak theihna hun ṭha vawi 10 a hmuh aṭanga vawi kua ngawt a chhawr ṭangkai theih avangin harsatna lian tham tawk loin hnehna a chang.

Britain tlangval Mur­ray chuan, "Set hmasa pahnihah beisei ka phak lo, a bik takin set hnihnaah ka service ṭum hnih ka hloh avangin ka tawrh phah reng a ni. A tawpah erawh ka insiamṭha thei a, match hmasa bera world number 73 hneh hi bul ṭanna ṭha a ni," tiin a sawi.

Roland Garros inkhel dangah seeded pariatna Kei Nishikori chuan Tha­nasi Kokkinakis lakah 4-6, 6-1, 6-4, 6-4 in hneh­na a chang. Kum 21-a upa Kokkinakis hi a dar dinglam zai a nih aṭanga kum khat leh thla hnih hnua a match hmasa ber a nih avangin Japan tlangval tan inkhel hautak a ni lem lo.

Hliam a neih ngun em avanga beisei phak ṭhin lo Juan Martin del Petro-a'n kum nga hnua a vawi khat nan French Open a khel ve leh ta. Argentina tlangval hian 6-2, 6-1, 6-4 in Guido Pella a hneh ve bawk.

Champion tura rinkai ni phak Stan Wawrinka chuan Slovakian tlangval Josef Kovalik lakah 6-2, 7-6, 6-3 in hnehna a chang ve bawk. Swiss star Wawrinka hian dar­kar khat leh minute 57 chhung lekin winners vawi 38 a vaw hman a ni.

Thawhṭanni zana an inkhel ruah sur leh light ṭha lo vanga an chawlh hnuah Fernando Verdasco leh kum 20-a upa Alexan­der Zverev te chuan Thawh­lehni zan khan set hnih dang an khelh chhunzawm. Verdasco hian 6-4, 3-6, 6-4, 6-2 in hnehna a chang. Seeded pakuana Zverev hi tun season clay court bika Rafael Nadal hneh thei awmchhun a ni a, inelna lianah erawh a kum naupanna a lang tih a hriat theih.