Riyad Mahrez-a'n chhuah a dil

Leicester City forward Riyad Mahrez chuan King Power Stadium chhuahsan a duh thu a tichiang ta. Kum 26-a upa forward chuan season hmasa khan club chairman nen season khat dang a cham leh phawt hnua chhuak turin inremna an nei niin a sawi.

Algeria international hian kum 2014 khan French club Le Havre aṭangin Foxes hi £400,000-in a zawm a, 2015-16 season-ah khan khawvel barakhaihin Premier League nomawi a chawipui. PFA player of the year-ah thlan zui niin nipui transfer lai khan Barcelona nen hial sawi zawm an ni.

Tun season-a inelna hrang hranga goal 10 khunga assist pasarih neitu Mahrez chuan, "Leicester hi nuam tiin zah viau mah ila thudik sawi a ṭul a, ka duhthlannaah thup tur awmin ka hre lo. Club hnenah chhuah ka duh thu ka hrilh tawh a ni," a ti.

Premier League an champion kuma goal 17 ngawt khungtu chuan sawi chhunzawmin, "Nikum nipui lai khan kan chairman nen ṭha takin kan inkawm a, season khat dang chama league leh Champions League-a team ṭha tak kan neih theih nana theihtawp chhuahsak leh phawt kha kan inremna chu a ni," tiin club nena inremna an neih tawh chungchang a sawi chhuak.

Kum 2016-a CAF African footballer of the year chuan, "Leicester-ah hian hun duhawm tak ka hmang a, he club tana kan hnathawhte avang khan ka inchhuang kumkhua ang. He club leh fan-te nena kan inlaichinna te hi ka hriatreng tur an ni tawh dawn. Chutihrual chuan fans lam pawhin ka duhthlanna hi hrethiama min zahsak ka ring tlat a ni," tiin fan-te hnenah hrethiam turin a ngen nghal.