Vawiinah Champions Trophy khelh a ni dawn
Cricket khawvela ram leh ram inelna sang ber dawttu ICC Champions Trophy chu vawiin hian khelh ṭan a ni dawn a, tlai dar 3:00-ah England leh Bangladesh ten match hmasa ber an khel ang. Final hi June 18-ah khelh tur a ni.
ICC Champions Trophy hi cricket-ah chuan World Cup dawta an inelna ngaihhlut ber a ni a, ICC ODI Team Ranking-a a sang pariat chinin he inelna hi an hmachhawn dawn. India chu champion lai niin he inelnaah hian vawi hnih ngawt nomawi an chawi tawh, inelna hi Star Sports channel-a pekchhuah tur a ni.
Inelna kalphung
Champions Trophy hi kum 1998 khan khelh ṭan a ni a, kum 2006 thleng khan kum hnih danah khelh ṭhin a ni. Mahse, 2006-a India-in inelna a thlen hnuah kum li dana neih turin inelna kalphung tih danglam a ni a, kum 2013 kha Champions Trophy khelh hnuhnung ber chu a ni.
Inelnaa tel team pariatte hi Group A leh B-ah pali ve vein ṭhen hran an ni a, group pakhata a tiṭha pahnihin semifinal an lut ang. Group A-a pakhatna leh Group B pahnihna an inhmachhawn ang a, Group B pakhatna leh Group A pahnihna te final luh inchuhin an inhmachhawn bawk ang.
Inlan tur
England leh Wales inthlen
ṭawm tur inelnaah hian champion lai India bakah Australia, Bangladesh, England, New Zealand, Pakistan, South Africa leh Sri Lanka an inlan dawn a, a vawi khat nan West Indies chu Champions Trophy-ah hian an inlan phak lo.
Windies hi Champions Trophy khelh a nih hmaa ICC ODI Team Ranking 'pawm' hnuhnung berah top eight-a an lan phak loh vanga inlan lo tur an ni. Group A-ah Australia, Bangladesh, England leh New Zealand an awmho a, Group B-ah India Pakistan, South Africa leh Sri Lanka an awmho thung.
India dinhmun
ICC nen an intihthiam loh avangin India-in Champions Trophy khelh tum lo zet mah se Supreme Court hial a inrawlh hnuah India-in an squad an puang a, an nomawi humhim turin rin an hlawh leh tawh hle - India hian an match hmasa ber chu Pathianni tlaiah Pakistan nen an khel dawn a, boruak a sang khawp ang.
Virat Kohli captain-na hnuaia khel tur India hian inelna ṭan a nih hmain warm up match pahnih an khel tawh a, New Zealand leh Bangladesh an hneh ve ve. Black Caps nena an inkhelah hian DL method hmangin run 45-in hnehna an chang a, Bangladesh hi run 240 zetin an sawp thung - India lakah beiseina a sang sawt dawn.
Team dang
England-in inelna an thlen avangin an mualah tawh an khirh dawn tih a chiang a, captain Eoin Morgan hoa khel tur team hian Jos Buttler, Joe Root leh Ben Stokes te an la kawl zui. AB de Villiers telna team hi team chhia an ni thei lo - a captain-na hnuaiah South Africa an khel ang.
Australia-in Steven Smith, David Warner leh Aaron Finch an neih miau avangin team ṭha an la ni reng a, Pakistan-in tun hma phak lo mah se Sarfraz Ahmed leh Shoaib Malik an la neih avangin en liam ngawt chi an ni bik lo. Kane Williamson, Martin Guptill leh Tim Southee telna New Zealand-in warm up match-ah India ngam lo mah se inelnaah chuan team dang daih an ni dawn tih a chiang - Champions Trophy a hmuhnawm dawn e.