Chelsea keeper Begovic a chhuak

Bournemouth chuan Chelsea keeper Asmir Begovic an lalut. Kum 29-a upa keeper man zat hi puanzar ni lo mah se pound maktaduai 10 bawr vel ni tura ngaih a ni a, Cherries-a a contract pawh hi hun rei tak chhung atan tih bakin puanzar a ni lo.

Begovic hian July 2015 khan Stoke City aṭangin Blues hi a pan a, kum li chhung cham turin contract a ziak. Mahse, London club-ah season hnih a cham chhungin league match 17-ah chiah inkhel bul a ṭan a, tun season-ah pawh Premier League nomawi chawi mah se vawi hnih bak a inlan loh avangin a khelh tam theihna tur Cherries lam a pan ta a ni.

Bosnia-Herzegovina international chuan, "Chel­sea-a Premier Lea­gue nomawi chawi kha nuam ka ti a, mah se khel­mualah hun tam zawk hman ka duh avangin tun hi ka tan chuan hun ṭhaah ka ngai a ni," tiin League One club an nih laia a lo khelh tawhna Cherries a pan chhan a sawi.

Bournemouth boss Eddie Howe chuan, "Asmir hi goalkeeper ṭha tak, inelna sang bera theih­na a neihsanzia lo pholang tawhtu a ni. Hruaitu ṭha tak a ni bawk a, i team enkawla awm tura i duh tur chi tak player a ni," tiin a player thar chu la fuh a inti hle.