A thiam 16 a hriat kim ta ; Tlai dar 4:00-ah CYMA Football Last 16 draw

TṬ Royte Trophy - Inter Branch YMA Football Tourna­ment-ah team 141 an tel a, tun­ah chuan team 16 chiah an dam ta.

Vawiin tlai dar 4:00 hian CYMA Hall-ah Last 16-a inkhel tur pawh a ni dawn a, LPS leh Zonet-in an live ang.

CYMA leh MFA ṭangkawpin an buatsaih inelnaa la damte chu Aizawl Venglai, Bawngkawn, Chaltlang, Chanmari, Chhinga Veng, College Veng, Durtlang, Hualngohmun, ITI Veng, Lei­tan, Lengpui, Ramhlun South, Republic Veng, Republic Veng­thlang, Salem Veng leh Zawl­nuam Borai te an ni.

Seeded a awm lo
Tie draw neihna hmunah hian team pakhat aiawhin mi pali branch OB, coach, manager leh team captain te chu an awm ngei tur a ni a, captain hian jersey a ha bawk tur a ni.

Seeded team an awm hran tawh lo a, eng team pawh in­hma­chhawn thei vek an ni.

Final-ah Extra time
Last 16 hi June 5-8 chhung khian nitnin match hnih a awm dawn a, match hmasa zawk hi dar 11:00 a khelh tur a ni a, a hnuhnung zawk hi dar 1:30-ah khelh tur a ni.

Quarterfinal hi June 12-13 khelh tur niin semifinal hi double leg-a khelh tur a ni a, June 19 leh 21-a khelh tur a ni. Final hi June 23, Zirtawpniah khelh a ni ang. Nomawi in­chuhnaah chiah hian team pahnih an inhnehtawk chuan extra time khelh tur a ni.

A la goal lo!
CYMA Football-ah goal ṭha­hnem tak a lut tawh a, amah­erawhchu top scorer hi last 16 aṭanga chhiar ṭan chauh tur a ni. Team an inthlauh ṭhin avangin round hmasa lam hi chhiar tel a ni lo. He tehna hmang hi chuan goal a la lut lo.

Goal khung tam ber hian Rs 2,500 an dawng dawn a, best player thlan a ni bawk ang.

Lammual fai zawk
CYMA Football hi Lam­mual­ah vek khelh a ni dawn a, Mizote khelmual ngai­nat ber hi a fai tawk lo. Nimin khan Ramhlun Vengthar ṭan­tu­te chuan an ṭhutna hmun K. Kawla Stand an thian fai a, an fakawm hle.

Lammual tihfai hi intihhmuh zel ni se, an thian fai thei lo a nih pawhin tibawlhhlawh lo se inkhel enna nuam zawk a awm thei dawn a ni.

En châkawm
Chhinga Veng hi NECS Cup champion lai an ni a, CYMA Football champion lai Armed Veng hnehtu Chanmari nen an pawt fuh a nih chuan inkhel class sang hmuh tur a awm ang.

Ramhlun South-in CYMA Football 2008-a an champion hnuah NECS Cup-ah kum zawna an champion theih avangin tun hnaia team ṭha ber pawl an ni. Anmahni ang bawka player nei ṭha Bawngkawn nen last 16-ah an intawn fuh chuan neutral supporter tan pawh en manhla tham a ni ang.

Veng inṭhenawm College Veng, ITI Veng, Repub­lic Veng, Republic Vengthlang leh Salem Veng-te an la dam - derby match boruak a san ṭhin avangin anni hi an inhmachhawn chuan veng mipui an inkhawrh chhuak ṭha thei vek ang. Hei bakah hian Durtlang leh Leitan hi pawh fuh an nih chuan boruak a nep chuangin a rinawm loh.

Aizawl khaw pawn aṭang la dam Hualngohmun, Lengpui, leh Zawlnuam Borai-te hi hmachhawn châkawm loh vek a ni - MPL player ṭha an kawl nual hlawm. Aizawl pawn team ni mah se an player-te hi Lammuala tlangnel tak tak an ni a, zuam chi an ni lo.

Team Ṭha tla tawhte
CYMA Football-a champion ngun ber Armed Veng leh nomawi chawi hnem ber dawttu Electric Veng te an tla tawh a, anni bakah hian a thiam 16 a telpha tura ngaih tling zo ta lo an awm nual bawk.

Inelna hnuhnung pathuma champion tawh leh a pumpuia vawi nga champion tawh Armed Veng hian an match hmasa berah Kanan 6-0 zetin an sawp a, amaherawhchu an vawi hnih khelhnaah Chanmari an hneh lo.
Electric Veng-in sulhnu ṭha hnuchhiah tawh mah se tun hnaia veng leh veng inelnaah erawh chhuan tham record an nei lo a, an chanchin a ṭha lama her an tum kumah Lengpui lakah an tlawm. Team 141 telna a nih miau avangin Armed Veng leh Electric Veng bakah hian team ṭha tla an tam hi a mak lo.

Armed Veng South-in an match hmasa berah Dawrpui Vengthar an hneh lo a, upset lian bera ngaih a ni. Vawi hnih champion tawh Dinthar, tun hnaia veng hmasawn tak Bethlehem Vengthlang bakah Zemabawk North, Venghlui, Luangmual, Khawzawl Jt YMA, Sihphir Venghlun leh Kawnpui Vengthar ten last 16 an thleng pha lo.

Nimin Inkhel Results
Hualngohmun 2 - 2 Khatla
Penalty Shootout-ah Hualngohmun 5-4 in an chak
HUA : Robert Lalliankima 6', 90+1'(P)
KHA : Michael Lalremruata 42'; Johny VL Muanpuia 77'
Ramhlun Vengthar 1 - 4 Chhinga Veng
RAM : Zodinmawia 15'
CHH : Lalsawmzela 10', 43'; Lalkhawpuimawia 85'; Lalthlamuana 90+2'
Lawmman
Champion Rs 1,00,000
Runners up Rs 50,000
Semi Finalist Rs 10,000
Quartel Finalist Rs. 5,000
Fairplay Rs 10,000
Best Player Rs 2,500
Top Scorer Rs 2,500