Sanchez leh Ozil hralh a pawi lo - Keown
Arsenal tana match 310 khel chunga Premier League nomawi vawi thum chawi thei Martin Keown chuan Alexis Sanchez leh Mesut Ozil-te'n club chhuahsan mah se pawi a tih loh thu a sawi.
Chile international Sanchez hian season liamta khan league bikah goal 24 khungin assist vawi 10 a nei bawk. Midfielder Ozil hian goal riat a khung bakah a ṭhiante goal khung tur vawi kua a siamsak ve bawk.
Season khat bak contract nei tawh lo player pahnih hian season duhawm an hmang, mahse an club hi FA Cup-ah an champion pui tih bak chhuan tur an nei lo. League-ah pangana niin Champions League an khel phak dawn lo. European football lamah Bayern Munich 10-2 a hneh loin an mualpho bawk.
Arsenal defender hlui Keown chuan, "Arsenal hian an player pahnih hi an hralh a nih chuan thutlukna dik a ni ang," tiin a sawi. Keown hian Sanchez leh Ozil te chuan club boruak an tih buai thu a sawi tel a, season pawimawh laiah an contract an tihfel mai theih loh avangin player dang ti phawklek leh boruak dang siamtuah a ngaih thu a sawi tel bawk.
Real Madrid aṭanga North London club zawmtu Ozil hian tun dinhmunah karkhatah £140,000 hlawhin Gunners player zinga hlawh hnem ber a ni mek, karkhata £250,000 hlawh tura contract thar zawrh chu a la pawm lo.
Barcelona forward hlui Sanchez hi Premier League club dang Manchester City leh Chelsea bakah Bayern Munich lamin lakluh an duh nia sawi a ni a, tunah hian £300,000 hlawh tura thlem a ni mek bawk.
Arsenal-in manager Arsene Wenger an chelh hnuah an zia thlak an tum deuh niin a lang. Club dang nena khaikhina player hlawha inseng hnem ngai lo hian sum thehchhuah an ui lo tih a hriat a, mahse an duh ang a la hlawhtling thei rih lo.