Keeper man to ber Moraes
Manchester City chuan Benfica aṭangin kum 23-a upa Ederson Moraes an lalut. Moraes hi pound maktaduai 35 man niin khawvela goalkeeper man to ber a ni.
Kum 2001 khan Gianluigi Buffon-a'n Parma aṭangin Juventus chu pound maktaduai 32.6 in a zawm a, he record hi Brazilian keeper Moraes-a'n a khum. Amaherawhchu euro aṭanga teh chuan Brazil U23 tana match nga khel tawh Ederson man hi euro maktaduai 40 chauh a nih laiin Buffon man chu euro maktaduai 53 a ni a, pawisa hlutna a danglam tak avangin Italian keeper hi a euro zawnga teh chuan man to ber a la ni reng.
Portuguese champion Benfica chuan thuchhuah siamin, "Benfica leh Manchester City-te chu keeper Moraes manah euro maktaduai 40-in an inrem," an ti.
Pathianni khan Benfica hian Vitoria Guimaraes 2-1 a hnehin Portuguese Cup an chawi a, he inkhel zawhah hian Moraes hian a club tana a match hnuhnung ber a nih theih tawh tur thu a sawi tawh a ni.
Pep Guardiola-a'n Manchester City a enkawl hnuah keeper hman lai Joe Hart a ring zo lo a, England international hi Torino lamah loan-in a chhuahtir. Hart hian Serie A club tan a khelh chhunzawm loh tur thu tichiang mah se City-ah hmun a chang dawn chuang lo.
Spanish manager hian Barcelona aṭanga a hriatchian Claudio Bravo chu nikum nipui lai khan a lalut a, Chile captain hian beisei a phak lo hle. Kar hmasa mai khan Willy Caballero an chhuah zalen bawk si avangin keeper an mamawh a, a chhanna chu Moraes hi a ni.
Tu nge Moraes?
Osasco, Brazil-a piang, feet ruk leh inches hniha sang Moraes hi a naupan lai chuan an ram club Sao Paulo tan a khel ṭhin. Sao Paulo-ah season khat a hman liam hnuah kum 16 mi chauh niin Benfica a zawm a, season hnih chhung second division lamah hun a hman hnuin kum 2015 khan senior team tan kum nga daih contract a ziak.
Benfica tan hian inelna hrang hrangah match 52 khel tawhin season liamta khan league match 25-ah a inlan. Moraes hi Brazil senior team tan a la inlan phak lo a, tun thla chhunga Argentina leh Australia te nen friendly match an khelh tur squad-ah erawh a hming a lang thung.