Juve hi vanneih vanga final lut an ni lo - Ronaldo
Real Madrid chuan June 3, Inrinni zan dar 12:15 hian Cardiff-ah Juventus nen UEFA Champions League final an khel dawn. Cristiano Ronaldo chuan Cardiff-a an hmachhawn tur Italian club chu vanneih vanga Champions League final lut an nih loh thu a sawi.
Kum 32 mi Ronaldo chuan, "Juventus hi team ṭha bik zinga mi an ni a, vanneih vanga final lut an ni lo. Inkhelh harsa tak a ni dawn a, chak tura dinhmun ṭha zawk an awm lo, final-ah chuan 50-50 a ni. Atletico Madrid ang thoin an khingpuite an hnaih ṭha a, an tlarhnung hi a ṭha em em a, amaherawhchu team zawng zawng hian chak lohna an nei a ni," tiin an khingpui tur Italian club a fak.
Portugal captain Ronaldo hian tun season hi Champions League vawi 14 a khelhna a ni a, vawi li final khel tawhin tun hi vawi nga a khelhna tur chiah a ni. Manchester United forward hlui Ronaldo hi Champions League-a goal 100 khung tling thei hmasa ber a ni a, Europe-a inelna sang berah hian goal 103 a khung tawh a ni.