Nipui transfer-ah Atletico an bazar dawn lo

Infiamna khawvela rorelna sang ber Court of Arbitration for Sport chuan nipui transfer-a player lalut thei loa hrem tawk mek Atletico Madrid hrem an nihna chu ken tlang turin a ti a, nipui bazar-ah Atletico Madrid-in player an lalut thei dawn lo. An pawisa chawi tur zat erawh £719,793 aṭangin £439,873 ah tih hniam a ni thung.

Atletico Madrid hrem an nihna hian Manchester Uni­ted a nghawng nghal. Jose Mourinho-a'n Antoine Griez­mann lakluh tumin a hel a, Spanish club hian an thiampuipa hi a thlakna tur awm lo chuan hralh an tum lo - United tan khaw dang hawi a ṭul ang.

Hrem chhan

January 2016 khan Atletico Madrid hi kum tling lo player an lakluh danah fel tawk lo a awm nia ngaih a ni a, Real Madrid nen hrem an ni. Club pahnih hi CAS lamah an zualko a, Real hremna hlihsak a nih laiin Atletico erawh hremna angin kaltlangpui a ni dawn. January 1, 2018 aṭangin player an lalut leh thei chauh ang.

Atletico chuan thuchhuah siam nghalin, "Thutlukna hian awn lam a neisa a, kan club hmingṭhatna zawng zawng a thai chhiain en hran kan ni," an ti a, an lungawi lo hle.

FIFA dan

Atletico hi 2007 leh 2014 inkara kum 18 hnuailam player an chhawr dan chungchangah hrem an ni a, Real hi 2005-2014 inkara an player chhawr danah thubuai siamsak ve tho ni mah se hrem an nihna hlihsak an ni thung.

FIFA danah chuan kum 18 hnuailam player chu ram pawn club-ah an kal dawn a nih chuan player chhungte chu football vang niloin an khelhna tur ramah an chen ve a ngai a, transfer titu club pahnih chu European Union emaw European Economic huam chhunga awm an ni tur a ni. Hei mai hi a ni lo, pla­yer leitu club chuan zirna, trai­ning, khawsakna leh awmna chung­changah player chu ṭha taka enkawlin club awmna aṭanga km 100 aia hla loah an awm­tir tur a ni tih thlengin a awm.

Atletico an zam lo

Diego Simeone-a'n nipui transfer-ah player lalut thei dawn lo mah se Atletico Madrid an zam lo. Spanish club chuan thuchhuah siamin, "Kan squad neihlaiah hian kan inringtawk a, he squad hmang hian season nga chhung a zawna Champions League khel turin kan inpetkai a, CL-ah hian semifinal lutin Copa del Rey semifinal kan lut bawk. Inlungrual takin kan thil tum hlawhtlin nan kan bei ho zel dawn a ni," tiin thuchhuah an siam a, Griez­mann a chhuah hmel ta lo hle.