Treble champion thei pakuana Juventus?

Juventus chu tun season-ah Serie A leh Coppa Italia-ah an champion tawh a, treble champion thei pakuana ni tura an hmaa ding chu Real Madrid chiah a ni.

UEFA Champions League final chu Inrinni zan dar 12:15 hian Cardiff-ah khelh a ni dawn a, Italian club hian hnehna an chang a nih chuan an club history kum 119 chhunga treble champion vawi khatna tur a ni ang.

Treble champion

Treble champion hi season khata nomawi lian pathum chawi thei tih sawi nan hman a ni. Mizote hriat lar English club tan chuan treble champion turin Premier League, FA Cup leh Champions League-ah champion a ngai a, Juventus tan chuan Scudetto (Serie A), Coppa Italia leh UCL nomawi chawi a ngai thung.

Tun season-ah Manchester United-in Europa League leh League Cup nomawi an chawi a, Jose Mourinho hote hian parukna ni loin pakhatna ni reng pawh ni se treble champion an la ni dawn chuang lo. A chhan chu Europa League leh League Cup hi a lian tawk lo a, chhiar tel a ni lo.

Manchester United legend Roy Keane chuan, "United anga club lian tan chuan League Cup leh Europa League te chu an lak ve reng tura ngaih theih a ni a, amah­erawhchu league lama an hnufual lutuk hi chu an player neih dan leh an sum hman dan ngaihtuahin zahna tur a ni. Season tawp lamah chhuanlam tam tak a siam a ni," tiin Portuguese boss a sawisel.

Kum 45 mi Keane hian kum 1998-99 season khan United chu a treble champion pui tawh a, 2009-10 season khan Mourinho hian Inter Milan chu a treble champion pui bawk.

Club pariatte chu

Celtic (1966-67) : Britain club zinga Euro­pean Cup chawi hmasa ber chu Scottish club Celtic an ni a, final-a an chakna hmun Lisbon hming chawiin he team hi Lisbon Lions tih an ni.

Celtic hian 1966-67 season-ah inelna panga an hmachhawn a, an champion vek avangin treble champion ni satliah loin quintuple champion tiha sawi theih an ni. Scottish club hian manager John Stein ho hian final-ah Inter Milan an hneh.

Ajax (1971/72) : Ajax-in kum nga hnuah treble champion pahnihna an rawn ni ve leh a, hemi ṭuma Dutch club thiam puipa chu Johan Cruyff a ni.

Dutch club hian final-ah Inter Milan bawk hmachhawnin Cruyff-a'n goal hnih a khung a, 'total football' an hmuhchhuah ṭantirh hunlai kha a nih avangin Italian club-in an ngam lo hle.

PSV Eindhoven (1987/88) : Guus Hid­dink-a kaihhruaina hnuaiah 1987-88 season-ah PSV Eindhoven-in harsatna nei loin Eredivisie-ah an champion a, Dutch Cup leh European Cup erawh a awlsam lo. Dutch Cup-ah PSV hian extra time-ah Roda JC-in an hneh a, European Cup-ah Benfica chu penalty shootout-ah an hneh bawk. PSV player panga chu Euro 1988 champion Netherlands team-ah an tel.

Manchester United (1998/99) : Sir Alex Fer­guson-a'n Manchester United dinhmun sang zawka a vawrhna chhan chu 1998-99 sea­son-a a treble champion pui vanga ni a, Scottish manager hnuaia United vul lai ber a ni.

United-in FA Cup semifinal-a Arsenal an hneh ṭumin Ryan Giggs chuan hriat hlawh reng tawh turin solo goal hmangin chakna goal a khung a, Champion League final-a Bayern Munich laka an thawhchhuah leh dan chu thawnthu ngaihnawm tak anga hriat reng a ni bawk.

Barcelona (2008/09) : Josep Guardiola-a'n khawvel hriata manager ṭha a nih tih a rawn lantir season-ah hian Barcelona hi an chungnung a, hneh theih loh anga hial ngaih an ni.

Catalan club hian Copa del Rey final-ah Athletic Bilbao 4-1 in an sawp thei a, La Liga nomawi chawi turin an hmelma Real Madrid 6-2 in an hneh a, Champions League final-a an khingpui Manchester United-in kawng tinrengah an ngam lo bawk.

Inter Milan (2009/10) : Celtic leh Ajax treble champion ṭumin Inter Milan chu a vanduai zawkah an ṭang a, Jose Mourinho kaihhruai Italian club treble theih nana langsar ber chu Diego Milito a ni. Argentine forward Milito hian Serie A match hnuhnung bera Siena an hneh ṭum leh Coppa Italia final-a Roma an hneh ṭumin goal awmchhun a khung ve ve a, Champions League final-a Bayern Munich an hneh ṭumin goal hnih a khung bawk.

Bayern Munich (2012/13) : Jupp Heync­kes-a'n manager hna chawlhsan nan season duhthusam a hmang a, Bundesliga-a cham­pion turin anmahni hnaih bertu Borussia Dort­mund aiin point 25 in an sang fal a, Champions League final-ah league-a an elpui BVB hi 2-1 in an hneh leh bawk. DFB Pokal final-ah Bayern hian VfB Stuttgart 2-1 in an hneh a, sulhnu ropui tak hnutchhiahin Heynckes-a'n manager hna chawlhsan.

Barcelona (2014/15) : Barcelona chu vawi hnih treble champion thei hmasa ber an ni a, hemi ṭuma manager Luis Enrique chuan tun season tawp rual hian Catalan club enkawl hna a chawlhsan.

Barca hi La Liga-ah Real Madrid chungah an awm a, Copa del Rey final-ah Athletic Bilbao an hneh a, Champions League final-ah tun season-a treble champion beisei Juventus an hneh a. Catalan club hian Lionel Messi, Luis Suarez leh Neymar te an neih avangin season khata nomawi lian pathum an chawi hi a mak lo.