Dan rual loh Rafael Nadal

French Open nomawi vawi 10 nana chawi turin Rafael Nadal-a'n kawng dik a zawh zel. Champion lai Novak Djokovic pawhin title humhim turin hma lam a pan zel bawk - player ropui pahnihte hi an chak chho zel a nih chuan semifinal-ah an inhmachhawn thei dawn.

Seeded palina Nadal hian Nilanini zan khan Philippe Chatrier Court-ah Robin Haase a hmachhawn a, darkar khat leh minute 49 an inkhelh hnuah 6-1, 6-4, 6-3 a chakin second round a paltlang.

Kum 2010 Wimbledon-ah Nadal leh Dutch tlangval te hi an lo inhmachhawn tawh, he mi ṭum pawh hian Nadal-a'n hnehna changin a champion zui. Roland Garros-ah pawh Nadal hian harsatna a tawk lo hle, winners vawi 33 vuain unforced errors vawi 13 chiah a nei a, a service a hum vek bawk avangin Haase tan hmunawl a siamsak miah lo a ni.

Spain tlangval Nadal hi Pathianniah kum 31-a tling tawh dawn a, tun ṭumah hian a champion thei a nih chuan Grand Slam inelna mala vawi 10 champion thei hmasa ber a ni ang.

Grand Slam vawi 14 cham­­pion tawh Nadal chuan, "Ni­kuma ka buaina ban rek na kha tun season-ah ka la nei leh lo, hei vang hian nuam ti leh inringtawk tak chungin ka inkhel thei a ni," a ti. Nadal hian third round-ah chuan Victor Troicki hnehtu Nikoloz Basilashvili a hmachhawn leh ang.

Clay court season duhawm hmangtu Nadal hian Roland Garros bikah match 76 khel tawhin vawi hnih chiah chak loh a la nei. Kum 2009 khan fourth round-ah rin loh takin Robin Soderling a ngam loh bakah 2015 quarterfinal-ah Djokovic lakah a chak lo bawk.

Djokovic a nghet

Grand Slam vawi 12 cham­­pion tawh Djokovic tan second round paltlang turin harsatna liam tham a la awm lo. Serbian tlangval hian darkar hnih leh minute sarih chhungin Joao Sousa 6-1, 6-4, 6-3 in a hneh a, third round-ah Diego Schwartzman a hmachhawn leh ang.

World number 2 Djokovic hian French Open atan bik Andre Agassi chu coach atan a hmang. World number 1 hlui kaihhruaina hnuaiah Djokovic hian match hnih a khel tawh a, set a la hloh miah lo.

Kum 30-a upa Djokovic chuan, "World number 59 nen kan inhmachhawn a, harsatna lian tawk loa ka tlang thei kha ka vannei," a ti. Djokovic hian unforced errors vawi 24 a nei a, match hmasa aiin vawi ngain a nei tlem zawk - hma a sawn hret.

Inkhel dang

Court number 1-a inkhelah Grigor Dimitrov chuan darkar hnih tling lo deuhah Spanish veteran Tommy Robredo 6-3, 6-4, 7-5 in a hneh. Seeded 11-na Dimitrov hian seeded 20-na Pablo Carreno Busta a hma­chhawn leh dawn a, inkhel awlsam a ni tawh dawn lo.

Season hmasa Wimbledon finalist leh tun ṭuma seeded pangana ni bawk Milos Raonic-a'n Brazilian Rogerio Dutra Silva lakah inkhel bulṭan ṭha lo zawk mah se a insiamṭha thuai a, darkar hnih leh minute 23 chhungin 4-6, 6-2, 6-3, 6-4 in hnehna a chang ve bawk.

Dominic Thiem-a'n game hmasa pathum a hloh zet hnuah Simone Bolelli 7-5, 6-1, 6-3 in a hneh thei. World number 6 Thiem chiah hi tun season clay court inelna bika Nadal hneh thei awm chhun a ni.

Khawtual tlangval Jo-Wil­fried Tsonga erawh world number 91 Renzo Olivo lakah 7-5, 6-4, 6-7, 6-4 in a vanduai. World number 12 Tsonga a tlak takah chuan French player champion beiseiawm an awm tawh lo. Kum 1983 hnu lamah Roland Garros-ah hian khawtual player an la champion leh lo a ni.