Manchester City-in champion kim an duh
Manchester City chairman Khaldoon Al Mubarak chuan, season tharah nomawi lian tham pali chawi vek an tum thu a sawi a, club tan season thar chu 'kum ṭha bik' a nih a beisei.
City hian Europe-a club ṭha pawl nih tumin khawvela manager hlawh hnem ber Pep Guardiola an la lut a, Spanish manager hnuaia an season hmasa berah nomawi chawi nei loin season an mangṭha.
Mubarak erawh a hnual phah lo. City neitu chuan, "Pep hian engtiklai pawhin hnehna chan a duh a, hei hi kan pahnih inanna tak a nih avangin ka ngainat phah a ni. Nomawi pali chawi hi a harsa a ni mai thei a, mah se ka tiam duh che u chu kan tum phawt dawn tih hi a ni," a ti.
City hotupa chuan sawi chhunzawmin, "Champions League nomawi chawi ka ngaihtuah ringawt pawh hian ka phur em em zel a, kan ti thei tihah hian ka chiang a ni. Season thar hi kan tan chuan kum ṭha a ni dawn a, tun hma zawng aia ṭha leh chak zawkin kan rawn kir dawn tihah hian rinna nghet tak ka nei a ni," tiin Pep leh a naute a ringtawk hle.
English club zingah season khata nomawi pali chawi thei club pakhat chiah an la awm a, 2008-09 khan Manchester United chuan Community Shield, League Cup, Premier League leh Club World Cup an chawi. City hian season tharah Premier League, FA Cup, EFL Cup leh Champions League an khel dawn a, an hotupa thusawi thlen dik tir tur chuan hengah te hian champion nomawi an chawi vek a ṭul ang.
Mubarak chuan, "Kawng dik kan zawh mek a ni. Manager ṭha tak kan nei a, a thiltihah kan thlawp tlat. Tun nipui transfer-ah pawh ṭha takin kan thawhpui dawn a ni," a ti a, nipui transfer-ah City hi an che na a nih pawhin a mak lo ang.