AFC Cup ; A thiam 16 zingah Bengaluru

Bengaluru FC-in AFC Cup last 16 lut turin an match hnuhnung berah chak ngei ngei an mamawh a, an mamawh chhan­na chu captain Sunil Chhe­tri a ni. Kum 32-a upa striker hian free kick mawi bik pet lutin a team chu hnehna a chanpui.

Nilaini zan khan Bengaluru chuan Maziya S&RC an mi­khual a, 1-0 in an hneh. Team pahnih hi an point hmuh zat inang mah se head-to-head a chungnung zawk Bangalore club an tlang.

Chhandamtu Sunil

Bengaluru coach Albert Roca-a'n chak an mamawh tih hriain 3-4-3 formation a hmang a, Sree Kanteerava Stadium-a inkhelah Lalthuammawia Ralte leh Daniel Lalhlimpuia chu bench-ah dah niin first eleven-ah Mizo tan hmun a awm lo. Inkhel ṭantir lamah Maldives champion-in hun ṭha nei hnem viau mah se Yasfaadh Habeeb-a'n a chance neih vawi tam a hlah a, Bangalore club tan vanneihna a ni.

Chawlhlawk hman a nih hnuah Bengaluru khelin awm­zia a nei sawt a, Eugeneson Lyng­­doh-a'n a chance neih goal-a a chantir theih loh hnuah Juanan tih tluk a nih avangin Bangalore club-in freekick an hmuh chu Sunil Chhetri chuan goal-ah a chantir. Maldives club-in Asadhulla hmangin chance nei ve mah se goal ruak-ah pawh goal an khung thei lo a, season hmasa finalist Bengaluru-in last 16 an lut.

Sunil vang a ni

Bengaluru coach Albert Roca chuan, "Hnehna chan ngei ngei kan mamawh tih kan hria a, Maziya khan an khel ṭhain an ruahmannaah khan an chiang em em a ni. Keini chuan ball chan tam kha kan duh ber chu a ni a, ball kan cham tam chuan Sunil te ang player ṭha kan neih avangin goal khungah harsatna a awm lo. Goal khung tum chuan risk lak a ngai a, harsa viau mah se Sunil kan kawl miau a ni," tiin a striker chu a chhuang vet vet hle.

Barcelona assistant hlui chuan sawi chhunzawmin, "Zaninah hian kan vannei tih ka pha lo a, a pawimawh ber erawh rim taka hnathawh a ni. Vanneihna hun kan tih hi keimahniin kan va tawng baw ngat dawn lo, a chang chuan chu vanneihna tawng tur chuan rim taka hnathawh a ngai a ni. Ka naute hian hlawhtlin an phu a, he club, players leh staff-te lawmpui a ni," a ti.

Jeje-a hoin Bagan

Mizo tlangval Jeje Lalpek­hlua'n Indian player zinga khawmualpui huap inelnaa goal khung hnem ber dinhmun luah turin goal thum chiah mamawh tawh mah se Nilaini zan inkhelah goal a khung lo. Bagan hian Nilaini zan vek khan Abahani Dhaka chu khualmualah lenchilhin goal khat ve ve khungin an inhnehtawk a, mah se an tlak chian tawh avangin an chak result hian nghawng a nei lo.

Dhaka khawpuia inkhel­ah hian Abahani tan Sunday Chizoba Nwadialu chuan minute 10-na lekah goal hma­hruai khung mah se Bagan-in an nawr chhunzawm a, Jeje-a'n a chance neih ṭhat vawi hnih ngawt a hlah hnuah minute 81-naah penalty a hlawh chhuak. Mizo tlangval penalty hlawhchhuah pet turin Katsumi Yusa a lo ding chhuak a, Japanese midfielder hian goal-ah chantirin team pahnih an inhnehtawk.

Hnahthial tlangval Jeje-a'n AFC Cup-a goal nga khung chung­in Asia khawmualpuia club inelna sang ber dawttu a mangṭha a, season hmasaa a goal khung zat pasarih nen goal 12 a khung tawh - goal khung hnem ber Bhai­chung Bhutia a phak lohna chu goal hnih a ni.