Club tana rinawm 'One-club man'

Francesco Totti-a'n season 25 chhung a pianna khaw club Roma tana a khelh hnuah Pathianni khan inkhelh a chawlhsan. Italian playmaker Totti hi kum 40 mi a ni a, a inkhelh hun chhung hian competitive match-ah Roma jersey tih loh chu an ram Azzurri kawr chiah a ha.

Club pakhat tan chauha rinawm hi 'one-club man' tih an ni a, senior level chinah chuan loan hmanga club danga an chhuak a nih pawhin 'one-club man' anga chhiar an ni lo. Bayern Munich legend Philipp Lahm meuh pawh loan hmanga VfB Stuttgart-ah season hnih a khelh avangin 'one-club man' a ni lo.

Rome mipuiin mittui nena an thlah liam Totti hi 'one-club man' a ni a. Mizo te hriat larah chuan Manchester United duo Ryan Giggs leh Paul Scholes te, Arsenal legend Tony Adams, Liverpool legend Jamie Carrag­her te chu one-club man a ni.

Tu nge la rinawm?

Football khawvelah sum chevel a tam a, player tan rin­awm a harsa a, sum vang lo pawhin nomawi duh vangin player ṭha­hnem takin club ṭha zawk an zawm bawk.

Tuna player khel laia club pakhat tana rinawm langsar zualte chu :

Andres Iniesta (Barcelona)

Spanish midfielder Andres Iniesta hian Barcelona tan season 15 khel tawhin match 624-ah a inlan tawh. Kum 33 mi Iniesta hi La Masia-a football a zir laiin lunglen vangin harsatna nasa tak tawk mah se tunah chuan Catalan club hi a in pakhat zawk ni thei tur khawpin sulhnu a nei ṭha tawh.

Iniesta hi Catalan club-in Champions League nomawi vawi thum an chawi theihna kawngah player pawimawh a ni a, ram lamah pawh a danglam lo. Spain-in UEFA Euro 2012 an champion khan player of the tournament atan thlan a ni.

Thomas Muller (Bayern Munich)

Thomas Muller hian kum 10 leka upa a nihin kum 2000 khan Bayern Munich hi a zawm a, khawvel huapa a rawn lar ṭan chu 2009-10 season niin khelhna hmun petu chu Dutch manager Louis van Gaal a ni a. German forward hian season kua chhungin Bayern tan vawi 394 a khel tawh a ni.

Muller hian Bayern hi Bun­desliga title paruk, German Cup pali leh Champions League pakhat bakah Germany chu World Cup 2014-ah a champion pui bawk. Amaherawhchu Muller hi kum 27 leka upa a ni a, one-club man ni chungin football khelh a chawlhsan ang em tih chu zawhna awm thei tak a ni.

Andy King (Leicester City)

English midfielder Andy King hi kum 15-a upa a nihin Chelsea-in an academy aṭangin an chhuahtir a, Leicester City lawmah a tla thung. King chuan, "Ka chunga an ṭhatna avangin ka lawm reng tawh ang," tiin a sawi.

King hian Leicester City tan season 10 chhungin vawi 363 a inlan a, league pathumah Foxes tan khel tawhin Premier League champion-na kawngah player pawimawh a ni.

Daniele De Rossi (Roma)

Totti-a'n Roma kawr hlip tawh mah se Rome khawpuiin chhuan tur an la nei a, a hming chu Daniele De Rossi a ni. Italian midfielder De Rossi hian Roma tan season 16 zet khel tawhin match 557-ah a inlan a, kum 33-a upa a nih tawh bawk avangin Totti hnungzuiin club dang a zawm a rinawm loh.

Player dang

One-club man la langsar zingah chuan Russian keeper Igor Akinfeev-a'n a club khelhna CSKA Moscow tan season 14 chhungin vawi 522 a inlan tawh a, St-Etienne defender Loic Perrin-a'n season 14 chhung thoin vawi 353 a khel tawh a, Portuguese keeper Rui Patrício-a'n Sporting Lisbon tan season 11 chhungin vawi 412 a khel tawh a, Ukrainian defender Yaroslav Rakitskiy-a'n season riat chhungin Shakhtar tan match 275 a khel tawh.

Amaherawchu Liverpool legend Steven Gerrard meuhin Liverpool chhuahsana club dang a zawm a nih chuan tuna one-club man langsar tak tak te pawh hi football boot an khai hma chu rin ngam an la harsa rih ang.