Brisbane International lamah Sharapova

Tennis season an ṭan chho mek a, world number 1 hlui Maria Sharapova chu duhsak taka wildcard pek a nih ang ngeiin Brisbane International-ah a inlan dawn.

January 6 aṭanga inelna neih tur Brisbane International-ah hian Venus Williams pawh inlan tura ngaih a ni. Mahse, American star hi training-na lamah hliam a neih avangin a inhnukdawk leh hnuhnawh a ni. Kum 32 mi Sharapova hi season hmasa khan hliam vangin a buai rei hle, August thlaa khelh US Open hnu lamah chuan inelna match pangngai a la khel leh miah lo. Tun inelna a hmachhawn tur hi Australian Open inbuatsaihna 

a ni nghal ang.

Grand Slam vawi nga champion tawh Sharapova chuan, "Brisbane hi ka ngai ṭhin, ka tan chuan kum 2020 bul ṭanna duhawm tak a nih ngei ka beiseiin ka phur takzet a ni," tiin a sawi. Australia rama tennis inelna ngaihhlut pakhatah hian player tel an ṭha dawn, world number 1 leh tualchhung nula ni bawk Ashleigh Barty bakah Australian Open champion lai Naomi Osaka te chu mipui lawm hlawh zual tur zinga mi an ni ang.