Misual mai ka ni - Eriksen

Tottenham Hotspur aṭanga Inter Milan pantu Christian Eriksen chuan Spurs-a a hun tawn a thlirkir a, "Thil tam tak avangin dem ka hlawh a, misual ang mai ka ni," a ti. 

Eriksen hi tun nipui transfer-ah a contract a zo tawh dawn a, hei vang hian Inter chuan pound maktaduai 16.9 lekin Danish midfielder ṭha hi an chan theih phah. 

Kum 27 mi midfielder hian Champions League final-a Liverpool an ngam loh zawhah khan chona thar hmachhawn a duh thu a sawi a, a thusawi hian Eriksen a zui reng.

Denmark tan vawi 95 inlana goal 31 khung thei chuan, "A nihna ang taka thil sawi duh mi ka ni a, player ṭhenkhat anga inzep ṭhen chi ka ni ve lo. Dik taka thil tih duh mi ka ni a, ring taka mi hriat tura sawi mai ka duh a ni.

"Ka chungchangah thil tam tak an sawi a, misual ang mai ka ni. Ka chhuah duh thu ka sawi hnuah kawhmawh bawl ching ka nih thu an ziah thlengin ka chhiar a, ka tan chuan chhuah ngei kha a ngai a ni," a ti. 

Eriksen hi Manchester United nen pawh sawizawm a ni a, mahse Danish midfielder chuan, "English football-a khelh chhunzawmin kawng awlsam thlang thei ka ni a, mahse chona thar hmachhawn kha ka duh chu a ni," tiin ram danga inkhelh duh vanga Inter pan a nih thu a sawi.