Champions League final Europe-a thiam ber hriat zan

Zaninah dar 12:15 a ri ang a, football ngainatu inti tawh phawt chuan Cardiff khawpui lam an hawi ang - Juventus leh Real Madrid ten Champions League final an khel dawn tlat.

Juventus-in 1995-96 hnua a vawi khat nan Europe champion nih an beisei dawn a, Real-in Champions League nomawi humhim hmasa ber nih an tum thung ang - a khaikhawm nan chuan zaninah football khawvelin inkhel hmuhnawm a hmu dawn.

Beiseina nen Allegri
Massimiliano Allegri-a'n season thum chhunga a vawi hnih nan Champions League final-ah Juventus a hruai thleng a, 2015 anga tlawm nawn a tum tawh lo. Italian coach chuan, "Champions League nomawi chawi thei chin an tam lo tih ka hria a, kum thum chhunga a vawi hnih nan final kan lut leh ta. Tun ṭumah erawh nomawi kan chawi ngei a ṭul," tiin champion ngei a tum.

Allegri chuan nomawi chawi erawh thil awlsam a ni dawn lo tih a hai lo. Italian manager chuan, "Kum thum chhunga kan final pahnihna kan khel dawn a ni mai thei a, mah se Real hi season lia vawi thum final khel thei an ni. Team ṭha tak an ni a, chak tura min beisei zawk an awm a nih pawhin Real thai bo ngawt chu a fuh lo ang. Ka sawi duh erawh kum hnih kal ta a Barcelona kan hmachhawn ṭum ai khan kan ṭha tawh zawk," a ti.

Real = 300
Zidane-a'n Juventus nen Champions League final an khelh hmain a naute fuih phur nan movie a enpui a, a film enpui hi Sparta Lal Leonidas leh a pasalṭha rual 300 ten huaisen taka Persian Lal Xerxes leh a sipai 10,000 chuang thih thlenga an beih dan chanchin a ni - Zidane-a'n pasalṭha anga huaisen taka bei turin a naute a duh.

French manager hian an film ena Lal Leonidas-a'n a naute a fuihna ṭawngkam chu Real player manto rual fuih nan a hmang a, "Kan chhungkua leh he team tan hian kan bei tur a ni a, media leh mi tam takin hnehna chang zo loa mualpho turin min duh. Mahse, mi min sawiselna leh rin lohna hi chak nan kan hmang tur a ni a, huaisen takin kan bei tur a ni," tiin a naute a fuih a, an chhawr leh chhawr loh zaninah a hriat ang.

Tu nge BBC?
Real Madrid tlarhmaa pla­yer pathum Gareth Bale, Karim Benzema leh Cristiano Ronaldo-te hi 'BBC' hming lem pek an ni a, khawvela tlarhma hlauhawm ber pawla sawi an ni. Quarterfinal-a MSN dah niltu Juventus erawhin an hlau ve lo a, BBC chungchang an zawhna Juve boss Allegri-a'n a chhanna chu, "Buffon, Bonucci leh Chiellini pawh hi BBC an ni," tih hi a ni!

Italian manager-in a tlar­hnung player-te chhuang taka a sawi hi a awm lo hran lo. Juve tlarhnunga Andrea Barzagli, Leonardo Bonucci, Giorgio Chiellini leh Gianluigi Buffon te hian tun season-ah match 50 khel tawhin goal 30 chiah an la chhuah a, match khata 0.6 % chhuah ang bak an ni lo. Tun season Champions League-ah match 12 khelin goal thum chiah an la chhuah bawk a, final lut turin tlawm hmel an hmu miah lo.

Real 'tak tak'
Allegri-a'n goal venhim an thiam avangin a naute a chhuang a ni mai thei a, Real goal khung theihna erawh hai der luih chi a ni lo. Spanish club hian match 12 an khelh tawhah goal 32 ngawt an khung a, match tinah goal khung loh an nei miah lo. Hriat tel tur erawh Real hian match khat chiah goal chhuah loh an nei - Paulo Dybala, Gonzalo Higuain leh Mario Mandzukic neitu Juve tan thu hriat nuam a ni.

Zidane tana buaina tur erawh Gareth Bale nge Isco a chhawr ang, tih hi a ni. Bale inhliam hlanin Isco a khel ṭha ṭhin takzet a, Zidane-a'n final-a a chhawr tur zawk a la sawi thei lo. French manager chuan, "Player pawimawh tak an ni ve ve a, mi tupawhin an ngaihdan an sawi thei. Mahse, ka buai phah lo ang," a ti a, a duhthlan a la sawi lo.