Ronaldo a inpeih tawh
Real Madrid tan ṭum dang ang bawkin Cristiano Ronaldo chu innghahna a ni leh dawn a, Portuguese forward hian Cardiff khawpuia final khel turin a inpeih tawh thu a sawi.
Kum 32-a upa forward chuan, "Season tawp kan khar dan hi a pawimawh lai ber chu a ni. Harsatna sawi tur ka nei lo a, in fit leh nuam ti taka khelh ka duh ber a ni," tiin a phur tawh hle.
Real-in season hmasaah Champions League nomawi an chawi a, tun season-ah an champion leh a nih chuan Europe-a club inelna sang berah hian nomawi humhim thei hmasa ber an ni dawn tihna a ni.
Ronaldo chuan, "League nomawi kan chawi avang khan inrintawkna kan neih belh nasa em em a, thawnthu thar ziaka Champions League nomawi humhim hmasa ber nih kan duh a ni," a ti a, tun season-ah hahchawlhna hun pek a nih ṭhin avangin a taksa lam inpeih thu a sawi bawk - Portugal captain hi league match kuaah khelhtir a ni lo.
Real coach Zidane chuan tun season-a Spanish club tana a goal 400-na khung tlingtu forward chungchang sawi ve nghalin, "Ronaldo hian final-ah ṭha taka khelh a duh avangin chawlh hahdam a mamawh a, tunah chuan inelna hmachhawn turin a inpeih tawh hle," tiin a sawi.
Ronaldo hian tun season-ah Real tan match 45 khelin goal 40 a khung sak a, Champions League-ah a goal 100-na a khung tling bawk. Real-in Champions League-a goal 500 khung tling turin goal khat chiah an mamawh tawh a, Ronaldo hi chhanna a ni thei ang.