Allgeri vs Zidane

Real Madrid boss Zinedine Zidane leh Juventus manager Massimiliano Allegri-te hi an tawnhriat neih tawh dan aṭanga thlirin khaikhin rual ni lo mah se, an ram ve ve a nomawi chawitu, Europe-a club ṭha ber nih inchuh tura an naute kaihruai thei an nih miau avangin khaikhin loh theih loh an ni!

Italian thluak

Kum 2014-a Antonio Conte-a'n Juventus a chhuahsan khan AC Milan boss hlui Massimiliano Allegri lakluh a ni. Old Lady (Juventus sawina) fans zingah Italian manager duh lohna thawm a ri ring hle. Mahse, kum 49-a upa manager hian amah ringhleltute rinhlelhna tiboin a season hmasa berah Serie A leh Coppa Italia nomawi a chawi nghal a, Champions League final a hruai thleng bawk.

Allegri-a'n 2014 final-ah Barcelona lo ngam lo tawh mah se Juve-ah a season thumna hmang mekin Serie A leh Coppa Italia-ah a la champion pui vek a, kum thum chhunga a vawi hnih nan Champions League final a lut ta.

Juve hi match 165 a kaihruai tawh a, vawi 116 hnehna a chanpui thei - a hnehna chan zat hi chawhrualin 70.30% a ni.

Mi ropui bik Zizou

Footballer ropui sawi apianga sawi hmaih ni ngai lo Zinedine Zidane-a'n coaching khawvel a luhchilh hnuah pawh football khawvela coach ṭha zingah a hming a ziak kai ṭan leh der tawh.

January 2016-ah Real enkawl ṭanin a season hmasa berah Champions League, UEFA Super Cup leh FIFA Club World Cup-ah a champion nghal! Tun season-ah La Liga-ah champion-in Champions League final a lut bawk - a hmaa ding erawh Allegri a nih avangin a awl dawn lo.

Zidane-a'n Real a enkawl hnuah match 86 khelin vawi 64 hnehna a chanpui - chawhrualin 100-ah 74.4 % a ni a, Allegri aiin a ṭha zawk.

Theihnghilh loh tur erawh Champions League 2015 final lut tura Juventus-in an hneh chu champion lai Real Madrid an ni a, Allegri-a'n Real a lo ngam tawh.

Hetih hunlaia Real coach hi Italian manager ropui Carlo Ancelotti a ni a, assistant coach chu Zidane a ni. French manager-in a pu hlui hoa an lo ngam tawh loh Juve a ngam dawn em, tih hi zawhna chu a ni a, a chhanna neih hun chu zanin a ni.