Buffon-a mang ram

Juventus goalkeeper chhuanvawr Gianluigi Buffon-a'n Serie A (10) leh Coppa Italia (3) nomawi chawiin World Cup-ah hial Italy champion pui tawh mah se Champions League nomawi erawh a la chawi lo - vawi hnih final lut tawhin a tlawm zawkah a ṭang ve ve a, kum 39-a upa ni tawh keeper hian nomawi hloh nawn a duh tawh dawn lo.

Italian goalkeeper ropui chuan, "Ka tan chuan a hlu ngawt ang. Kan champion a nih chuan World Cup no­mawi ka chawi nen khan ka career-a ka hlim ber ṭum a ni dawn a ni. Tumruhna, huaisenna leh beih hram hramna hmangin tun dinhmun hi kan thleng a, kawng harsa tak aṭanga kan thlen chin hi a ropui a ni," a ti.

Italy tana vawi 168 inlan tawh midfielder chuan sawi chhunzawmin, "Hlauhthawnna engemaw tak hi chu ka nei a, hetiang game hautak khelh dawn chuan ka nei fo. Mahse, huaisenna hmangin ka hneh ṭhin bawk. Hei hi 'hlauh ka nei ve lo' tia insawi ṭhinte aia ka chak zawkna ni bawkin ka hria. Inrintawkna nen he final hi hmachhawn kan tum dawn a, inkhel hamrik tawp ruala kan inchhirna tur engmah tih kan duh lo," a ti a, kut ruaka Cardiff khawpui chhuahsan a tum lo.