Durant khelhna Warriors-in Cleveland hneh

Kevin Durant-a point 38 score hmangin nimin zing khan Golden State Warriors chuan NBA Final Game 1-ah Cleveland Cavaliers 113-91 in an hneh. Thawhṭannni zing dar 5:30-ah Game 2 khelh leh a ni ang.

Oracle Arena, Oakland-a inkhelah Warriors tan hian Durant bakah point 28 score tu Stephen Curry chu mipui lawmhlawh ber a ni. American guard hian assist vawi 10 a neih bakah rebound vawi ruk a la bawk, three points vawi ruk ngawt a vawm lut a ni.

Golden State leh Cleveland te hi tun hnai season thum chhung chu a zawnin NBA Finals-ah an intawng ta a, tun hmain hetianga vawi thum intum zawn thei hi an la awm ngai lo. Warriors hian point 22 zeta hnehna changin series-ah 1-0 in hma an hruai rih, ngaihṭhatna tur erawh a la ni lo. Season hmasa khan 3-1 a an hnufual hnuah Cavs hian an lehthal thei a ni.

Warriors an pui

NBA team ṭha pahnih inkhelah player langsar leh tawnhriat ngah inlan mah se a tirah an inveng tawn a, minute thum a liam dawnah Cavs tan J.R. Smith-a'n he inkhela basket hmasa ber a nei chauh.

Champion lai Cleveland hian quarter hmasa ber hun chanve an khelh zawhin 12-8 in hma an hruai. Warriors tan Durant-a'n point nei zuiin a nihrual a, Curry-a'n a hun takah three points nei zuiin quarter hmasa berah 35-30 in hma an hruai nghal a, first half an khelh zawh meuh chuan 60-52 in hma an hruai fal hman tawh a ni.

Cleveland hian inkhel chawhma lam­ah trunover vawi 12 ngawt an nei a, heng zinga vawi sarih chu an thiampuipa LeBron James-a neih a ni. MVP chawimawina vawi li dawng tawh James hian inkhelh hun chhung zawngin point 28 a score bakah rebound vawi 15 lain double double nei mah se a tihsual hliahkhuh nan a tawk zo lo.

Golden State lamin hnufual lai nei loin an hmahruaina an sawhnghet chho zel a, quarter tina a chungnung zawk an nih vek theih avangin chak phu zawk an chak. Inkhelh chhung zawngin turnover vawi li chiah an nei a, kum 2013-a San Antonio Spurs record siam chu nihrualin NBA Final game mala turnover nei tlem ber an ni. Cavs neih zat - vawi 20 nen a inthlauhna chu ṭum 16 zet niin inkhel hmelhmang thlak danglamtu a ni.

Eng nge an sawi?

Oklahoma City Thunder aṭanga GSW zawmtu Durant chuan, "Hei aia ṭha zawk pawh hian kan la khel thei, a bul ṭan nana hnehna chan hi nomawi chawi tur chuan a pawimawh hle," a ti. Durant hian court chhungah minute 38 hun a hmang a, inkhelh chhung zawngin player langsar ber a ni tluan chhuak zak.

Tun season playoff chinah Golden State hian match 13 khel tawhin hnehna an chang fai vek a, match 11 zetah point 10 chuang vekin hnehna an chang thei. Chak zawn rei lamah hian Los Angeles Lakers-in kum 1988 a record an siam tawh nih rualin NBA playoff bika hneh loh nei loa kal tluang rei ber an ni - record thar siam turin match khat bak a ngai tawh lo.

Cavs coach Tyronn Lue chuan, "Ka hmuh ve phak chinah chuan team ṭha ber an ni. Kum tin record thar an siam thei zel a, an la siam belh zel bawk ang," tiin an hneh loh team a dah sang thiam hle.

Warriors coach lailawk Mike Brown a la ṭawng fimkhur hle, an khingpui chu insiamṭha thei an nih thu sawiin, "LeBron khan kha aia ṭha zawkin a khel thei tih kan chiang. Cavs hian player langsar an kawl hnem a, Kevin Love leh Kyrie Irving te awmna an nih maiu avangin fimkhur takin Game 2 atan kan inbuatsaih ang," tiin a sawi.