Chhinga Veng-in semifinal lut

GIG Motors Pro Volleyball League khelh mekah Ningani zan khan Chhinga Veng chuan 3rd MAP 3-0 a sawpin semifinal an lut chiang ta. League match pathumah set hloh loin hnehna an chang vek a, team paruk inel zinga semifinal lut thei hmasa ber an ni.

R. Dengṭhuama Indoor Sta­dium, Mualpuia inkhelah Chhinga Veng hian 25-13, 25-18, 25-19 in hnehna an chang. An match hmasa lamah Ramhlun Sporting Club leh Hunthar te 3-0 ve ve in an hneh tawh a, an league round hnuhnung berah TNT hneh lo pawh nise a sang pali zingah an tel dawn chiang tawh.

Chhinga Veng tan hian ṭum dang ang bawkin spiker Mandeep Singh a khel ṭha leh hle, point 19 hlawh chhuakin a vawi hnih nan LG D3 Player of the Night atan thlan a ni.

Mizo player hlanga khel MAP hian beisei an phak lo chhunzawm zel, an match hmasa zawkah TNT 3-2 a an hneh loh tawh bawk avangin semifinal beiseina a chau hle. Chhinga Veng lakah hian player mala point 10 nei tling an awm miah lo. Inrinni zanah Hunthar nen an inhmachhawn leh ang.