Andy Murray a huaisen

World number 1 Andy Murray-a'n clay court-ah duhthu­sama ṭhaa a la khel chhuak thei lo chungin hnehna a chang hram. Ningani zan khan Martin Klizan lakah set khat a hloh zet hnuah huaisen taka a beih let ngam avangin French Open third round a lut leh ta.

Suzanne Lenglen Court-a inkhelah Murray hian darkar thum leh minute 34 chhungin 6-7(3), 6-2, 6-2, 7-6(3) in hnehna a chang. Slovakian tlangval lakah Murray hian a service vawi hnih a hloh a, a khingpui service hi vawi ruk a chhuhsak thei thung.

Britain tlangval hi tun season-ah a dar na vangin a inkhel tam tawk lo a, a inkhelh chhunah beisei a phak lo fo bawk - match 18 hnehna a channa chiah a ni. Third round-ah chuan Juan Martin del Potro a hmachhawn leh ang.

Grand Slam vawi thum cham­pion tawh Murray chuan, "Kar hnih liamta a ka khelh dan nena khaikhin chuan tunah chuan ṭha tawh tak a ni. Zawi muangin hma ka sawn a, round sang zawkah ka khelh ṭhat zel ka beisei," a ti. Kum 30-a upa Murray hian nikum khan final a thleng a, khatih hunlaia world number 1 Novak Djokovic lakah a tlawm.

Hliam a nih hnuah Murray hi tun hma angin a service a ṭha tawk lo a, tun ṭumah erawh aces vawi kua a siam thei a, a service hmasa zawk chu 50% dik bawkin round hmasa lam nena khaikhin chuan hma a sawn.

Vawiin chawhnu lama an in­khelh hmabak thlir lawkin Murray chuan, "Ka hmuh dan chuan Del Potro hi khawvela player ṭha berte zinga mi a ni. Hliam a neih ngun avangin a ranking a hniam a ni mai thei, ranking hi a dinhmun tehna tur a ni lo. Player ṭha hmaah a theihna san zia a pholang fo tawh a, inkhel hautak a ni dawn," a ti.

Kum 28-a upa Del Potro hi Nicolas Almagro nen inkhelin 6-3 in set khat ve ve an la a, set thumnaah 1-1 a nih laiin Spain tlangval Almagro hi a khup hliam vangin a khel chhunzawm thei tawh lo.

World number 30 Del Potro chuan, "Tennis hi a pawimawh a, chutihrualin taksa hriselna hi a pawimawh ber zawk chu a ni," tiin a khingpui inhliam a hnem. Del Potro hi a ban rek zai a ni tawh a, kum nga hnuah French Open a khel ve chiah a ni.

Stan a ding nghet

Inkhel dangah seeded pa­thumna Stan Wawrinka chuan world number 89 Alexandr Dolgopolov lakah 6-4, 7-6 (7-5), 7-5 in hnehna a chang a, Roland Garros-ah hian third round vawi 10 a luhna chiah a ni.

Swiss star hian French Open-ah hian kum 2015 khan nomawi a chawi tawh a, kuminah match hnih a khelh tawhah set a la hloh lo - champion thei tura rinkai zingah a tel.

Khawtual tlangval Gael Mon­fils-a'n a mumang neih a chhunzawm zel. Seeded 15-na Monfils hian darkar khat leh a chanve chhung lekin Thiago Monteiro 6-1, 6-4, 6-1 in a hneh. Jo-Wilfried Tsonga a tlak tawh avangin Monfils hian mipui ṭan rawn a hlawh zual phah hle.

Asian tlangval Kei Nishikori chuan Jeremy Chardy 6-3, 6-0, 7-6 (7-5) a hnehin second round a paltang ve bawk. Kevin Anderson-a'n rin loh takin Australian rawlthar Nick Kyrgios 5-7, 6-4, 6-1, 6-2 a barakhaih a, a vawi khat nan third round a lut. South Africa tlangval hian Kyle Edmund a hmachhawn leh ang.

Beisei loh result dang kan hmuh lian tak chu Tomas Berdych tla hi a ni. Seeded 13-na Berdych hi seeded pawh ni phak lo Karen Khachanov lakah 7-5, 6-4, 6-4 in a tlawm.