Round of 16 chu hei le

TṬ Royte Trophy - Inter Branch YMA Football Tournament Round of 16 fixtures chu nimin tlai khan Central YMA Hall-ah pawh a ni a, June 5 aṭangin Lammualah inelna ngaihven hlawh hi inkhelh thiam veng leh khua 16-in an khel ṭan ang.

Inelna boruak sang tawh a, inkhel turte team-te an inpeih tawh a, mipui an phur tawh. CYMA Football Round of 16 hi LPS leh Zonet-in live in a pe chhuak dawn a ni.

Lengpui Vs Ramhlun South

Round of 16 inelna ṭan nan Aizawl khaw pawna champion tawh awm chhun Lengpui leh player langsar ngah Ramhlun South an inkhel dawn.

Lengpui veteran player Rohmingthanga'n Shillong Lajong-a bul a ṭanpui Samson Ram-engmawia telna Ramhlun South a hmachhawn tur ringawt pawh hi sawi zui tham a ni.

ITI Veng Vs Zawlnuam Borai

Tun hmain ITI Vengin sulhnu ṭha an nei tam tawk lo a ni thei a, tun ṭumah erawh Dinthar hnehtu hi team ṭha an ni. ITI Veng khingpui tur Zawlnuam Borai hian MPL player ṭha M.S.Dawngzela leh Zaithanmawia te an nei a, team intluk tawk tak an ni.

Aizawl Venglai Vs Chhinga Veng

Chhinga Veng hian an veng ṭhenawm Aizawl Venglai hi awlsam taka an hneh theih an inbeisei dawn a; amaherawhchu Mizoram Police coach Laltuakliana Renthlei hoin Aizawl Venglai hian NECS Cup champion hneh dan tur duan chhuah an tum thung dawn a ni.

Durtlang Vs Salem Veng

Durtlangin tualchhung football-ah sulhnu an nei ṭha a, tun ṭumah hian Ricky Lallawmawma leh Lalliansanga te an kawl bawk. Salem Veng lamin tualchhung footballer chhuak thar zinga a ṭha rual an kawl thung a, inkhel hmuhnawm tak tur a ni.

College Veng Vs Leitan

College Veng hi ve-teran coach H. Vanlal-thlanga'n a enkawl a, Leitan hian NECS Cup 2013-ah coach Thlanga enkawl Chanmari hnehin final an lo lut tawh. Tun ṭum hi phuba lakna rem-chang a ni dawn. Leitan player pawimawh ni ṭhin B. Zoramthara chu College Vengah a pêm tawh a, R. Laldanmawia pawh College Veng-ah a awm. Leitan erawh dah hniam theih an ni lo - champion rinkai Be-thlehem Vengthlang hnehtu an ni.

Chaltlang Vs Bawngkawn

'Derby' kan ti lo thei lo - ṭhenawm inkhel tur an ni. Chaltlangin Last 16 lut turin goal an chhuah lo a, an khingpui tur Bawngkawn hi goal 24 khung thei an ni thung. CYMA Football-ah Chaltlang hi vawi hnih an champion tawh a, sulhnu an nei ṭha. Amaherawhchu an khingpui tur Bawngkawn hian nomawi la chawi lo mah se player an nei langsar zawk.

Republic Veng Vs Hualngohmun

Last 16 thleng tura goal khung tam ber Republic Vengin kumin NECS Cup-ah Hualngohmun hi 3-0 in an hneh. Tun ṭumah erawh Republic Veng khelmualah khelh a ni tawh dawn lo a, Lammualah khelh a ni tawh dawn bakah Hualngohmunin an intawn hmasak ṭuma inlan lo MPL-a player ṭha Lalruatpuia leh Van-lalthanga-te an chhawr thei tawh ang.

Chanmari Vs Republic Vengthlang

Chanmari-in coach atan tawnhriat nei ṭha Chawngthansanga an chhawr a, an khingpui tur Republic Vengthlang coach hi MPL5-a Chanmari FC nomawi chawipuitu Lalsangzuala Hmar a ni.

Chanmari hian tlar-hnung an neih ṭhat bakah goal khung turin Jerry Mawihmingthanga an kawl. Republic Veng-thlangin Chanmari FC champion-na kawnga player pawimawh Lal-ruatfela Zote, C. Lalro-sanga leh Lalmuanawma bakah MPL5 best defend-er Lalhlimpuia an kawl - an intum tawk ang.

TṬ Royte Fixtures
Last 16
June 5, Thawhṭanni
11:00 AM Lengpui Vs Ramhlun South A
01:30 PM ITI Veng Vs Zawlnuam Borai B
June 6, Thawhlehni
11:00 AM Aizawl Venglai Vs Chhinga Veng C
01:30 PM Durtlang Vs Salem Veng D
June 7, Nilaini
11:00 AM College Veng Vs Leitan E
01:30 PM Chaltlang Vs Bawngkawn F
June 8, Ningani
11:00 AM Republic Veng Vs Hualngohmun G
01:30 PM Chanmari Vs Republic Vengthlang H
Quarterfinal
June 12, Thawhṭanni
11:00 AM Win of A Vs Win of B QF1
01:30 PM Win of C Vs Win of D QF2
June 13, Thawhlehni
11:00 AM Win of E Vs Win of F QF3
01:30 PM Win of G Vs Win of H QF4
Semifinal
1st leg : June 19, Thawhṭanni
11:00 AM Win of QF1 Vs Win of QF2
01:30 PM Win of QF3 Vs Win of QF4
2nd leg : June 21, Nilaini
11:00 AM Win of QF4 Vs Win of QF3
01:30 PM Win of QF2 Vs Win of QF1
Final - June 23, Zirtawpni