Yaya Toure-a'n contract thar a ziak

Manchester City midfielder Yaya Toure chuan Etihad Stadium-a kum khat dang cham turin contract a ziah belh.

Monaco leh Olympiakos player hlui Toure chuan, "City-a ka zinkawng hi a la tawp lo tihin ka infuih ṭhin a, ka la cham tur hian minti lawm hle a ni," tiin a sawi.

Kum 34 mi Toure hian kum 2010 khan Barcelona aṭanga City hi a zawm a, English club tan match 299 khel tawhin goal 81 a khung. Ivorian midfielder Catalan club aṭanga chhuahtu hi Pep Guardiola a ni a, Spanish manager-in City a zawm tirh pawhin buaina an nei nghal.

Toure hian Champions League playoff-a Steaua Bucharest nen August thlaa first leg an khelh ṭumin inlan mah se City boss Guardiola leh Ivorian midfielder agent Dimitri Seluk te an inhmuh thiam loh avangin Barcelona midfielder hlui hi Champions League squad-ah telh a ni lo. November thlaah agent aiawhin Toure-a'n ngaihdam a dil a, hemi thla vek hian Crystal Palace nen league match-ah a inlan ṭanin goal hnih a khung.

Season a tawp meuh chuan Toure hian match 31 a khel a, Guardiola nen an inrem hnuah player pawimawh zingah a telpha tihna a ni. Ivorian midfielder-in contract thar a ziah lai hian season tawp ruala contract tawp tur goalkeeper Willy Caballero, winger Jesus Navas bakah defender pathum Pablo Zabaleta, Gael Clichy leh Bacary Sagna te chuan tun thla tawp hian City an chhuahsan ang.

Spanish manager Pep-a'n club thar din tumin ṭan a la a, Monaco midfielder Bernardo Silva chu pound maktaduai 43 in a lalut tawh a. Benfica goalkeeper Ederson Moraes chuan goalkeeper manto ber ni turin pound maktaduai 35 in City a zawm tawh bawk a, season thar atan English club hian pound maktaduai 78 an hmang der tawh a, an la hman belh bawk ang.