Kum 2020 thleng Falcao

Radamel Falcao-a'n Manchester United leh Chelsea tana a hlawhchham hnuah a theihna pholang lehin Monaco chu 2016-17 Ligue 1-ah a champion pui a. French club hian Colombian striker hi kum 2020 thleng a contract an pawhsei sak.

Monaco captain Fal­cao chuan, "AS Mona­co-a ka zinkawng ka chhunzawm thei tur hi ka lawm. Season ṭha tak kan hmanzawh tak kha min tiphurtu a ni a, thawnthu ngaihnawm ziah chhunzawm leh kha ka duh a ni. Season tharah pawh kan chet ṭhat leh ngei ka ring," tiin a ṭawng­kam hman aṭangin inrintawkna a nei let leh tawh tih a hriat theih.

Falcao nena inkawp Kylian Mbappe chuan, "Kan squad-a player vannei ber ka ni. A chhan chu ka career ṭantirh a khawvela striker ṭha ber zinga mi Falcao nen kan inkawp thei hi ka vannei a ni. Ani chuan football khawvelah goal hmangin sulhnu a hnutchhiah tawh a ni," tiin a sawi.

Colombian striker hian league-ah goal 21 a khung a, a kawppui Europe club lian ten an inchuh Mbappe hian league-ah goal 16 a khung ve bawk. Monaco hian midfielder Bernardo Silva chu Manchester City lakah an hum zo lo a, Falcao chelh thei mah se season tharah chuan Mbappe nen an inkawp theih a beiseiawm tawh lo.