Sheffield lakah Arsenal an vannei

FA Cup champion hnem ber Arsenal chuan semifinal thleng turin vanneihna an mamawh tel a, hun tawp dawna Dani Ceballos goal hmangin Sheffield United 2-1 in an hneh hram - an hmabak chu champion lai Manchester City a ni dawn.

Pathianni zan Wembley Stadium-a inkhelah Gunners lamin Nicolas Pepe penalty chhuih luh hmangin hma an hruai. Sheffield lamin David McGoldrick hmangin sut ve mah se hamrik hnuhnung a rik hma chiahin Ceballos-a'n chakna goal a khung.

Mikel Arteta-a'n a squad neih ṭhat ber a chhawr nghal lo. Captain Pierre-Emerick Aubameyang chu bench lamah dah a ni a, tun hnaia khelhna hmun chang tam lo Alexandre Lacazette chu tlarhma laiah awmin a sirah Pepe leh Bukayo Saka te an awm.

Midfield ho khawm turin Granit Xhaka dah a ni, contract ziak thar David Luiz chu a hmun pangngaiah a awm. Keeper Bernd Leno inhliam karah Emiliano Martinez chuan si ban a nghak. Southampton an hneh ṭuma hliam tenau tuar Kieran Tierney chu a hmun ngaiah a ding leh thei bawk.

Sheffield United-in Newcastle an hmachhawn ṭumin defender pawimawh John Egan hnawhchhuah a ni a, an chak lo - Manchester United a hmachhawn theih loh zui avangin an tlarhnung a pawp; Arsenal lakah erawh tlarhnung lailum luahtu a ni leh thei tawh.

John Lundstram-a'n goal hmahruai tauh lut mah se offside vangin hnawlsak a ni a, English midfielder hi season chawhma lamah khel ṭha mah se chawhnu lamah a vanduai, chawlhlawk hmain dar hliam vanga lakchhuah a ngai zui.

Minute 25-naah box chhung chiahah Lacazette-a ball chang chu midfielder Chris Basham-a'n a ti tlu a, penalty a chawi. Pound maktaduai 72 mam Pepe tan khung turin harsatna a awm lo, an goal khat neih hi an chak tlang pui mai dawn ni pawhin a lang hman.

Sheffield vanduai a kaltluang, Egan leh McGoldrick ten goal sual chhuakah inngai mah se offside vang bawka pawm a ni lo. Minute 87-ah Sheffield hun a thleng - McGoldrick chuan siphurh sutin an phur thar a, na takin an 

nawr chhunzawm.

Chris Wilder-a naute an phur lutuk a, tlarhnung lam an ngaihthah. Arsenal lamin counter attack aṭangin na takin an vaw let. Pepe-a'n holam takin ball a hloh tawhah inngai mah se a hnunga awm Ceballos chuan la zuiin chep tak karah goal hlu bik a khung.

Arsenal manager Mikel Arteta chuan, "Team hmachhawn harsa tak lakah hnehna kan chan theih a vangin a lawmawm takzet. FA Cup hi kan tan chuan European football khelh theihna kawng pawimawh a ni a, a tawp thlen kan tum ang.

"Hmasawn ngaihna lai chu a la tam tehmeuh mai a, chutih rualin hnehna chang turin kan beih dan khan min ti lawm. Hnehna kan chan apiang hian hlimna mai bakah inpumkhatna min thlen ṭhin," a ti.

Sheffield United coach Chris Wilder chuan, "Arsenal khan an nunna turin an tlarhnung an veng hram hram, an theihna sang ber hman ngai khawpin kan nawr na a ni. Football-ah chuan ṭha taka khelh pawhin chak loh chang chu a awm.

"Manchester United hmachhawn hnuah Arsenal kan tum zui a ni a, kan tan chuan a harsa ve bawk a ni. Kan inkhel tawk em em a, chak phu ve ve kan ni bawk. A tawpah erawh inrintawkna nei sang zawk an vannei," a ti.