Leclerc chetsual niah Max chungnung
Ferrari car tlan chakzia kan hria, inhrilh nawn a ngai lo - car sen khalhtu Charles Leclerc chuan a hmasa ber aṭanga tlan ṭanin hma a hruai, mahse tuma tih buai lohin a chesual. Max Verstappen tan kawng a hawnsak a, ani hian a hun ṭha neih a bawhpelh lo.
Pathianni zana tlan French Grand Prix-ah Verstappen a tlan chak ber a, tun season chhungin vawi sarih a chakna a ni. Driver championship-ah amah hnaih bertu Leclerc aiin point 63 zetin a sang fal ta, intlansiak hmabak 10 la awmah a dinhmun a ṭha ta hle.
Car intlansiakna sang ber hi tun thla chhungin vawi khat an la tlan leh dawn. July 31, Pathianni hian Hungaroring tlankawngah Hungarian Grand Prix an tlan leh ang, champion lai Max tan nomawi humhim turin boruak a fuh rih viau a ni.
Max a chungnung
Circuit Paul Ricard tlan kawngah Verstappen hi rinkai a ni a, chutih rualin a hmaah Leclerc a tlan avangin na taka inum tura ngaih an ni. Mahse, Leclerc a chetsual takah chuan Max tan hna harsa pakhat chu a kiang.
Red Bull driver hnungah hian Lewis Hamilton a thleng. Mercedes car khalhtu nen an inkarah hian second 10 bawr vel chauh a awm, season hmasa champion tuma inum pahnihin chungnung zawk nih an inchuh hi a hmuhnawm lehpek hle.
Dutch tlangval Verstappen chuan, "Ferrari car kha a chak tih phat rual a ni lo, chutih rualin kan car pawh a chak ve tawk. Charles a chesual kha pawi ka ti, a hliam nat loh hram ka beisei," a ti a, an team chuan season hmang ṭha mah se hmasawnna tur an la nei tih a sawi bawk.
Mahni tihsual
Season tirah kha chuan Charles Leclerc hi fal taka kal thei tura ngaihna a awm hman. Mahse, Ferrari driver hian team thutlukna siam sual bakah ama tihfuh tawk loh a tuar ta zauh zauh, intlansiak vawi 12 awm tawhah ṭum thum chauh a la chak.
French Grand Prix-ah pawh hian a hmasa ber aṭangin a tlan ṭan a, tuma tih buai loha a tlan laiin car a thunun thei lo. Kawng laiah virin kawng sirah a tawlh chhuak a, bang su zuiin a tlan chhunzawm thei tawh lo.
Leclerc chuan, "Hetianga tihsual ka neih fo chuan thlen san a harsa ang, inelna boruak sang leh pawimawh laia tihsual neih chu a pawi. Midang mawhpuh tur an awm lo, keima tihsual a nih avangin insiamṭhat nghal a ngai," a ti.
Vawi 330-na chu
Lewis Hamilton tan French Grand Prix hi mellung pawimawh phunna hun a ni, car intlansiakna sang berah hian vawi 300 a tlan tlinna chiah a ni. Hnehna chang chiah lo mah se, tun hnaia an team hmasawn dan thlir chuan lawmna tur a ni ang.
Hamilton-a teammate George Russell chu pathumna a ni a, Red Bull car hnungah Mercedes driver pahnih an thleng - an hnungah Red Bull car khalhtu pakhat zawk Sergio Perez a thleng ve bawk, team pahnihin intlansiak an thunun hneh viau.
World champion vawi sarih ni tawh Hamilton chuan, "Kei leh ka team tan chuan result ṭha tak a ni," tiin an result-ah a lungawi thu a sawi. Britain tlangval hi championship table-ah parukna a ni a, season kal laiah chak la nei lo mah se point 127 a khawl khawm tawh.