A tawp ka la thleng lo - Neeraj Chopra

India tlangval chuanvawr, fei khawh (javelin) huanga India ram tihmingṭhatu Neeraj Chopra chuan a thlen chin aṭanga hmasawn zel a tum a, a sang thei ang ber thleng ngei turin a thawkrim chhunzawm dawn.

Tun hnai khan Neeraj hian World Athletics Championships-ah silver medal a khawh chhuak. India tlangval hian 88.13m a thui a khawh a, a chungah 90.54m a thui khawhtu Anderson Peters a awm thung.

World Athletics Championships-ah India hian medal a la khat hle, 2003 khan Anju Bobby George chuan long jump huangah bronze medal a lo la tawh, ani hnuah chuan Chopra hi medal la leh thei pahnihna a ni.

Kum 24 mi Neeraj chuan, "A boruak leh khaw awm dan velah khan harsatna ka tawk, mahse silver medal ka hlawh chhuak hi ka lawm takzet. Ka elpui Anderson Peters leh Jakub Vadlejch te chungah ka lawm, inelna hautak leh nuam min chhawp chhuahsak.

"Thli thaw khan min tibuai deuh a, rilru a la peng bawk. Amaherawhchu theihtawp takmeuh ka chhuah a, a rah chhuahah lawm tur ka ni. India tan a ni a, hei aia sang zawk thlen tumin ka bei chhunzawm zel ang," tiin a sawi.

Haryana tlangval Neeraj hian Tokyo Olympic-ah khan gold medal a lo khawh chhuak tawh, khami ṭum khan 87.58 m a thui a khawh - Indian infiammi zingah athletics huanga Olympic gold medal la thei hmasa ber a ni hial.

Olympic ai kha tun ṭumah hian a khawh thui hret, mahse a elpui a phak lo hret thung. Tun kartawp aṭangin Commomwealth Games 2022 chu Birmingham, England-ah khelh a ni dawn, medal dawn leh ngei a tum ang.

Hmasawn a tum thu sawiin Neeraj chuan, "Gold medal dawn châkin ka la tuihal reng, mahse inelna hmachhawn apiangin pakhatna a nih vek theih loh tih erawh kan hriat a ngai. Thil tum mumal tak nei chungin training ka chhunzawm zel dawn.

"Ka malpuiah hliam tenau ka nei a, chu erawh harsatna siam tham a ni lo turah ka ngai. Taksa fit leh hrisel ṭha tak nei chungin Commonwealth Games ka khelh theih ngei ka beisei," tiin a sawi.