Hmeichhe team 12 chiah an dam tawh

Tualchhung volleyball inelna ngaihhlut - D3 Amrit Cement 22nd Inter Branch YMA Volleyball Tournament 2022-ah hmeichhe team 12 chiah an dam tawh a, vawiin hian R. Dengṭhuama Hall, Mualpuiah last 16 khelh zawh a ni ang.

Hmeichhe inelna hi court 3-ah khelh a ni a, nimin khan last 16 match hnih khelh a ni tawh. Nimin tlai khan last 16 match hmasa berah Bungkawn chuan Thingdawl Hmar Veng chu 3-0 (25-17, 25-12, 25-9) in an hneh a, quarterfinal lut hmasa ber a ni. Nizan khan last 16 match hnihnnaah Dawrpui Vengthar leh Electric Veng te an inkhel a, result kan hre hman lo.

Vawiin hian match ruk dang khelh a ni dawn. Chawhma dar 10:00-ah Armed Veng South leh Durtlang te an inkhel dawn. AVS-ah hian senior player Lalawmkimi Khenglawt, Rody Lalzuiliani bakah VL Hmuchhuaki (Police) leh Afaki (P&E) te an awm avangin team ṭha zawka ngaih an ni.

Match hnihnaah PVL club Bungkawna khel Lalbiakdiki (BD-i) awmna Hlimen-in Khawlian an hmachhawn ang. Team ṭha Kanan leh Tanhril ten match thumna an khel dawn. Kanan hi PVL club an ni a, PVL player hlang tia sawi theih an ni. Vardingliani, Vanlalremruati (Rem Remi) leh F. Lallianchhungi te awmna hi champion rinkai an ni pha.

Match linaah Falkland leh Bethlehem Vengthlang te an inkhel dawn a, team pangngai ve ve an ni. BVT hi PVL club ni mah se PVL player an nei lo thung. Thenzawl Field Veng leh Chanmari West ten match ngana an khel dawn a, Thenzawlah hian PVL club Bungkawn player Malsawmtluangi a awm.

Match tawp berah Lungmuat leh Kolasib Diakkawn te an inkhel ang. Kolasib Diakkawn hian PVL club Bethlehem VT-a khel Lalmuanpuii leh Lalrinzuali te an kawl a, chak tura rinkai zawk an ni ang.

Court 3 Hmeichhia
Last 16 - Vawiin Inkhel Tur
Armed Veng South Vs Durtlang
Khawlian Vs Hlimen
Kanan Vs Tanhril
Falkland Vs Bethlehem Vengthlang
Thenzawl Field Veng Vs Chanmari West
Lungmuat Vs Kolasib Diakkawn
Note : Dar 10:00 aṭangin an inkhel ṭan ang. Inkhel en man hi Rs 20 a ni.

Nimin Inkhel Results
Second Round - Round of 32
Thenzawl Field Veng bt Sairang
25-16, 25-19, 25-22 (3-0)
Chanmari West bt N Lungleng
25-14, 25-10, 25-15 (3-0)
Lungmuat bt Phunchawng
25-16, 25-10, 25-10 (3-0)
Kolasib Diakkawn bt Republic Veng
25-14, 25-14, 25-11 (3-0)
Third Round - Last 16
Bungkawn bt Thingdawl Hmar Veng
25-17, 25-12, 25-9 (3-0)