Goal leh assist neitu Messi

Lionel Messi-a'n season thar inbuatsaihna a hmang ṭha. Paris Saint Germain forward hian nimin tlai khan Gamba Osaka lakah goal a khung bakah Neymar khung tur a siamsak bawk a, a team hi 6-2 in hnehna a chanpui.

PSG tan Neymar-a'n goal hnih a khung a, ani bakah hian - Pablo Sarabia, Nuno Mendes, Messi leh Kylian Mbappe ten goal khat ṭheuh an khung. Japanese club tana Keisuke Kurokawa leh Hiroto Yamami te goal khungin awmzia a nei lo.

Season hmasa khan Messi hian pre season a hmang mumal lo, season tir lamah hliam vangin a buai bawk - Argentina captain hian a club tan season ṭha a hmang thei lo. Barcelona chhuahsan boruak bakah inbuatsaihna ṭha tawk lo a tuar.

Kuminah erawh a tir aṭangin pre-season a hmang thei a, goal khung pawh a harsat lo. Manager thar Christophe Galtier kaihhruaina hnuaiah inbuatsaihna an nei ṭha a, nikum aiin beisei an nei sang zual ang.

Messi, Neymar leh Mbappe te inkawp kan hmu leh dawn a, Ligue 1 chauh ni loin Champions League thlengin an beisei leh ang. UCL lama hlawhtling tur erawh chuan Sergio Ramos hoin an tlarhnung lam an chetṭhat tel a ngai dawn.