United leh De Jong - a la chiang thei lo!
Manchester United manager thar Erik ten Hag-a'n Old Trafford a pan hnua lakluh a tum hmasak ber chu Frenkie de Jong a ni a, mahse, Dutch midfielder hi vawiin thlengin an la lalut thei lo.
Premier League club hian De Jong an duhzia hi thup an tum lo - club pre-season tour meuh pawh zawm loin, United chief executive officer Richard Arnold leh football director John Murtough te chu Barcelona-ah an zin a, Barca an dawr.
Club pahnih hi Netherlands international manah hian pound maktaduai 63.5-in an inrem a, a khelh ṭhat dan a zirin Red Devils hian £8.5mtd pek belh pawh an la inhuam cheu.
Barcelona hian heti zata United-in lakluh an ngam hi bawhpelh phal chiah an ruat lo a, De Jong hi chhuak turin an nawr - a tan Old Trafford pan a ṭhatzia thlengin an hrilh a, mahse, a chhuak duh tlat lo.
A chhan chu
De Jong-a'n Europa League khelh a châk lo a, a duh ber chu Champions League a ni - mahse, tuna amah duhtu ber United hian European football-a club inelna sang ber khel loin Europa an khel dawn a, De Jong a phur lo.
He buaina bik tak hi chu 'season khat atan' a ni mai a, De Jong hian phur loh phah mah se a indantir ber erawh niin a lang lo - Dutch midfielder chhuah châk loh chhan ber chu Barca-in a hlawh an la ba tlat hi a ni.
Kum 2019-a Ajax aṭanga £86mtd-a Barca pantu De Jong hi Covid-19 vangin Nou Camp-a a hun hmasa lamah a hlawh tihhniam a ni a, Catalan club hian euro maktaduai 17 zet an pek a la ngai.
De Jong-a contract-a a lan danin, Dutch midfielder hi July 1 aṭanga chhiar ṭanin Barca-ah kum li dang cham tur a ni a, hemi chhung hian Barca-in a hlawh an batsakte an tlak tur thu a tel. Mahse, ba pawh an pek hmain chhuak turin an duh leh si!
Chhuak mai la
Barcelona president Joan Laporta chuan De Jong nen inbiakna an neih leh tur thu a sawi a, Manchester United nen inremna an neih vek hnua an player chhuak duh lo buaina chu chinfel an mamawh thu a sawi.
Laporta chuan, "Kan player a ni a, player theihna nei sang tak a ni bawk a, kan player duhtak a ni. Kan buaina ṭhenkhat hi sawifel a ngai a, mahse, tunah erawh Barcelona player a la ni.
"Sawmna pawh a dawng nual a, mahse, a thil duh tak hrechiang tura inbiak phawt kan mamawh avangin amah duhtu club-te kan la dawr lo," a ti a, Dutch midfielder nen inbiakna an neih tur thu a sawi.
De Jong duhtu zingah Chelsea hming lam rik a ni a, Dutch midfielder hian United ai chuan London club pan a châk zawk niin khawthlang media ṭhenkhat chuan an tarlang.
A mak asin
Barca hian De Jong chu sum lama an harsatna avanga chhuahtir tur an nih thu an hrilh tawh a, mahse, heti chung hian transfer bazar-ah sum an seng huai em em reng a, Dutch midfielder tan he thutlukna ringawt pawh hi hriatthiam a harsa ang.
Catalan club hian kum 25 chhung atana an television rights 25% chu US investment fund Sixth Street hnenah an hralh tawh a, Barca Licensing & Merchandising company-a share 49.9% chu hralh an la tum bawk.
Barca hian mi tih ngai loh dan meuh ti a, risk la chungin sum an dap khawm a ni ber a, mahse, chuti chunga sum an inren lohzia thlir hian De Jong tan club ṭanpui duhna rilru a tlahniam lo thei lo.
De Jong hi a dinna ngaiah rei tak a ding a nih chuan United pawh hian inhnuhdawh mai an pawi ti lo chhoin a rinawm a, English club hian Lazio central midfielder Sergej Milinkovic-Savic an thlithlai mek tawh niin an sawi.
Chhuah loh chuan...
Barcelona hian US-a tour an neih mekah De Jong hi an hruai tel a, Inter Miami leh Real Madrid an hmachhawnnaah hian bench aṭanga luhtir ve ve a ni - chu aia mak zawk chu tlarhnungah an chhawr ve ve!
De Jong hi centre back-ah ve ve a khel a, Barca hian an mamawh tawh lo tih thiltih hmangin lantir an tum ni berin a lang. Barca boss Xavi chuan, "Frenkie nen kan inbe tawh a, ka duhzawng tak a ni.
"Ka tan chuan footballer pawimawh tak a ni a, mahse, sum dinhmun leh financial fair play dan thlengin ngaihtuah tel a ngai. Centre back-a khel chungin team tan a ṭangkai thei tih ka hria a, centre back-a a khel kha hmuh nuam ka ti a ni," a ti.
Xavi hian khawvela midfielder ṭha ber pawl hi tlarhnungah ṭha a ti thar thut lo ang tih a chiang a, Spanish coach hian De Jong hi a chhuak lo a nih chuan a dinhmun a khirh dawn, tih hmuhtir a duh ber niin a lang zawk.
Xavi thlirna
Barcelona-in pre-season match 'hot' taka Real Madrid an hmachhawn ṭumin midfield-ah Gavi, Pedri leh Sergio Busquests te ho bul an ṭantir a, bench-ah Franck Kessie leh Miralem Pjanic te an la awm bawk avangin an indaih rih hle.
Catalan club hian De Jong a chhuah hian a thlakna lak kher pawh an ngai tawh lo tihna a ni a, an television rights leh BLM share hralh tur dah ṭhat chuan, sum tuak nana player an hralh dawn chuan De jong hi hralh to theih tak player an neih tlemtê zinga mi a ni tlat.
Barca boss Xavi chuan De Jong hi a cham a nih chuan first choice a nih tawh loh tur thu a hrilh niin an sawi a, Spanish chanchinbu Diario AS tarlan dan phei chuan Xavi hian De Jong hralh duhtu chu amah a nih thu Dutch midfielder hi a hrilh.
Heng zawng zawng ngaihtuah chuan US tour match hniha centre back-a a chhawr pawh hi Xavi hian a dinna tihlan a duh niin a lang a, De Jong hian a sum tam tak an batsak thlir chungin Barca a chelh tlat dawn nge, a career din thar leh nan United a zawm dawn? tih chu hunin a la hril ang.