Nadal hnung zuitu Alcaraz

Carlos Alcaraz chuan a naupan lai aṭanga a mi ngaihsan leh entawn Rafael Nadal hnung a zui zel. Mipa tennis thuneitu sang Association of Tennis Professionals (ATP) ranking thar berah number 5 a ni - Nadal hnuah a sang zual panga zinga lut thei naupang ber a ni.

Ranking thar hi nimina tihchhuah niin, hemi ni hian Alcaraz hi kum 19, thla hnih leh ni 20 mi a ni. May 5, 2005 khan Nadal chuan record a lo siam tawh, khatihlaia kum 18, thla 11 leh ni ruk mi ni chungin world number 5 a lo ni tawh.

Spanish star Nadal-a record hi khum thei an la awm lo a, tunah chuan a hnampui Alcaraz hian rawn khum chiah lo mah se a hnung a rawn zui. Grand Slam vawi 22 champion hnungah a kal, hmabak êng tak a nei.

Ranking chhuak tharah hian Hamburg Open champion Lorenzo Musetti a invawrh sang. Italian tlangval hian Alcarez hnehin nomawi a chawi a, ranking-ah hian number 31 niin tennis a khelh hun chhunga a tawn san ber ṭum a ni.

Dominic Thiem pawhin hma a sawn ve leh hret. Austrian star hi hliam vangin a inkhel tam lo, tun hnaiah rawn chak chho ve lehin player 75 ngawt a kal kan a, tunah chuan number 199 a ni ve leh ta - US Open hmain a ranking hi a la tisang zel thei ang.

Hmeichhe ranking chhuak tharah danglam langsar tak a awm lem lo. A sang zual 10 zingah chuan Garbine Muguruza chuan Danielle Collins tlan pelin pariatna dinhmun a luah, a chung berah Iga Swiatek chu point 8336 neiin a la awm zel.