Neymar-a rit phurh chawk tur kan nei - Tite

Brazil manager Tite chuan tun hnaia an ram player chhuak tharte chuan beiseina an siamsak thu a sawi a, an player pawimawh Neymar-a rit phurh tam tak chu heng player tharte hian an chhawk theih a beisei.

Tun hnaiah Brazil hian player ṭha an ngah chho hle, kum 25 hnuai lam zingah Vinicius Jr leh Rodrygo (Real Madrid), Raphinha (Barcelona), Richarlison (Tottenham Hotspur), Bruno Guimaraes (Newcastle United), Antony (Ajax), Matheus Cunha (Atletico Madrid) leh Gabriel Martinelli (Arsenal) te an nei.

Tite chuan, "Rawlthar ṭha tak tak an rawn chhuak hian min tilawm hle, anni hian Neymar an pui thei dawn a ni. Khelmual chhung leh pawn lamah pawh kawng tam takin Brazil tan rah ṭha an chhuah ngei ang.

"Neymar nen pawh kan sawi dun tawh, ani chuan player ṭha an tam tak avangin coach tan inkhel tur ber thlan a harsat tur thu min hrilh. Ka tan chuan a ṭha hlir zinga khel tur thlan chu thil nuam tak tur a ni, khel tur nei mang loa in koh ai chuan duhthusam," a ti.

An player pawimawh leh tlarhma lama an innghahna Neymar hi kum 30 mi a ni tawh a, ani hian ram tan match 119 a khelh aṭangin goal 74 a khung tawh, an ram tana goal khung hnem ber Pele (77 goals) a tluk teuh tawh hle.

Tite-a'n a ṭul a nih chuan Neymar hi tlarhma laia chhawr theih ni se a duh. Qatar World Cup-ah ram pakhat tan player 26 a hruai theih dawn, substitute panga an lut thei ang, danglamna siam hlawk tham a thlak theih tihna a ni.

Brazil coach Tite chuan, "Neymar hi player fing leh themthiam bik a ni a, goal khung bakah a siamsaktu thlengin a ni thei vek. Football khelh dan phung a danglam reng a, tlarhnung veng paha goal kan nawr a ngai a nih pawhin ani bawk hi a pawimawh dawn," tiin Neymar a dahsang hle.

World champion vawi nga ni tawh Brazil hi World Cup hnuhnung berah khan, quarterfinal-ah Belgium 2-1 a hneh loin an tla. Tite-a'n a la enkawl chhunzawm dawn - Tele Santana (1982 & 1986) hnua a zawna World Cup vawi hniha Brazil enkawl thei hmasa a ni ang.

Kum 61 mi Tite chuan, "A pawimawh ber chu ṭha taka khelh a ni. Chutihrualin World Cup boruak hi chu a danglam daih, tournament dang zawng aiin taksa leh rilru inpeih a ngai. Russia rama kan tihsual aṭang khan kan inzir dawn.

"Kan squad-ah player tawnhriat nei ṭha tak tak an awm dawn, anni hian nasa takin min pui thei ang. Brazil ropuina ang kha chhawm nun kan tum dawn a ni," tiin a sawi, anni hi hneh loh nei loa World Cup inpet kai thei an ni hial.