MLS transfer: European player langsar an pem

European football tih loha khawvel football league ngaihven hlawh thlang dawn ila, Major League Soccer hi lam hmasak pawl a ni ngei ang - MLS hian player langsar tak tak an lo neih tawh ṭhin avangin ngaihven a hlawh pawh hi a awm lo hran lo.

David Beckham, Steven Gerrard, Thierry Henry leh Wayne Rooney te pawhin an hun tawp lam hman nan MLS hi an lo hmang tawh ṭhin a, fans tam tak an ken tel ṭhin avangin MLS-in nasa takin ngaihven a hlawh phah ṭhin.

Kum 2022-ah pawh European football-a hming langsar tak takin MLS panin an puanthuah an tel leh ta a, ṭum dang aia a danglamna pakhat erawh European club-a sawmna tam tak la neiten MLS pan an thlang hi a ni.

Real Madrid forward hlui Gareth Bale-a'n transfer bazar-a thawm a neih natzia chu inhrilh nawn ngai loa hriat sa vek a ni - mahse, European club tam takin an dawr chungin MLS pan a thlang a, hei ringawt pawh hian MLS hlutna a belhchhah.

Transfer hun
MLS hian European football ang thoin season khatah transfer bazar vawi hnih an hawng a, chutihrual chuan an transfer hawn hun erawh a inang lo thung - an season hman chhung a inan loh vang a ni ber.

Europe-ah chuan August-ah season bul ṭan a ni tlangpui a, May-ah season an khar tlangpui - hetiang a nih avang hian nipui transfer leh thlasik transfer neih hran ṭhin a ni.

MLS hian February 10 - May 4 inkarah transfer bazar hmasa zawk an hawng ṭhin a, season kal laiin, July 7 - August 4 thleng transfer an hawng leh bawk - tun transfer chu an khar ṭep tawh tihna a ni.

Tun season US top flight league hi February 26 khan khelh ṭan a ni a, October 9 thleng regular season chu khelh niin, November 5-ah MLS Cup final khelin season an khar ang.

Lunglentu Italy
Tun season MLS transfer bazar-a thil danglam ve tak chu US club ten Serie A lam an hawi nasa hi a ni a, Italian top flight league-a player langsar tak tak lakluh an nei nual.

An lakluh hma season lawka Serie A khel aṭangin Lorenzo Insigne, Giorgio Chiellini leh Federico Bernardeschi ten MLS an pan vek a, a bik takin Insigne leh Bernardeschi phei chu European football player langsar la ni lai an ni a, US an pan hian mak tih a hlawh.

Thil danglam ve tak pakhat erawh player pahnih laluttu club hi Toronto FC ve ve an ni a, Italian legend Chiellini erawh Gareth Bale laluttu Los Angeles FC-in an thlemchhuah a ni thung.

Insigne leh Bernardeschi te hian European football khelh la thlang zawk pawh ni se duhtu tam tak an nei. Mahse, US football an thlang a, a chhanah sum a tel - Insigne hian season khatah $15mtd a hlawh niin an sawi a, Bernardeschi hian $5mtd a hlawh dawn niin an sawi thung.

Italy tlangval
European football en ṭhang tan chuan player langsar Insigne leh Bernardeschi ten European top flight league khel tura theihna an la neih reng lai a, Toronto FC an pan hi a uiawm a, MLS fan-te tan erawh lawmna tur a ni thung.

Italy international Insigne hian loan-a a chhuak tih loh chu Napoli ni lo, club dang tan a la khel ngai lo a, mahse, season hmasaa match 37 aṭanga goal 13 khungtu forward hian club langsar tak tak karah Toronto pan a thlang teh tlat!

Napoli tan match 434-a goal 122 khungtu Insigne hian Toronto hi free transfer-in a zawm a, kum li chhung atana contract a ziah bawk avangin European top flight league-a kan hmuh a beiseiawm tawh lo.

Bernardeschi hi Italy tan vawi 39 inlana goal ruk khung thei a ni a, Juventus player a ni a, kum 28 mi lek a ni bawk. Mahse, European football-a hun hman reng ai chuan US pan a thlang a, Fiorentina attacking midfielder hlui Bernardeschi hian July 15 khan Toronto-ah kum li khel turin contract a ziak.

LA lam hawiin...
Tottenham Hotspur lama kir tur anga sawi thawm a awm a, Cardiff City hming an lam ri bawk a, European club tam tak hming a ri bawk - mahse, a tawpa Gareth Bale thutlukna erawh US lam pan a ni.

Welsh forward hian Los Angeles FC a zawm a, Los Blancos (Real Madrid sawina) tana Champions League nomawi panga chawi tawh forward hian kum khat atan contract ziakin, kum 2024 thleng cham theihna dan a ziak tel bawk - dollar maktaduai hnih aia tam a hlawh lo niin an sawi.

Kum 33 mi Bale hmaa LAFC pan thlangtu Chiellini erawh a kum a tam deuh tawh a, a thutlukna pawh a awm viau tawh - kum 37 mi a ni tawh a, Juventus tan Serie A nomawi vawi kua a chawi tawh.

Chiellini hi a kum tam deuh tawh mah se season hmasa khan inelna hrang hrangah Juve tan match 26 ngawt a la khel thei a, $1.65mtd vel lek a hlawh bawk avangin LAFC-in ani ang player langsar an la thei hi vanneihna a tling.

Hello Shaqiri
Kum 30 mi lek la ni mah se Shaqiri-a'n US pan a thlang a, February 2022 khan Chicago Fire FC tan kum 2024 thleng cham turin contract a ziak. Switzerland international man zat hi dollar maktaduai 7.5 a tling hial.

Season khata dollar maktaduai riat chuang hlawh anga sawi Shaqiri hian Europe-ah FC Basel, Bayern Munich, Inter Milan, Stoke City, Liverpool leh Lyon tan a khel tawh a, Swiss Super League, Bundesliga leh Premier League-ah a champion tawh a, Champions League nomawi vawi hnih a chawi tawh bawk.

January 2022 khan Leonardo Campana-a'n Inter Miami chu loan-in a zawm a, Wolverhampton Wanderers forward hi chu ti taka langsar ni lo mah se kum 21 mi chauh a la ni a, European football-a hming langsar ni thei tura theihna nei a ni.

Kum 32 mi Héctor Herrera hi player langsar vut ni lo mah se FC Porto leh Atletico Madrid tana lo khel tawh a ni a, Mexico tana vawi 100 inlan thei midfielder hian March 2022 khan Houston Dynamo a zawm - kum 2024 thleng atan contract a ziak a, a ṭul dan a zirin kum 2025 thleng a cham thei ang.

Costa kha...
European football ngaina inti chuan Douglas Costa in hre fur ang - Brazilian club Grêmio aṭanga bul ṭan, Shakhtar Donetsk aṭanga hriat hlawh, Bayern Munich leh Juventus-a a hming chhertu hian MLS a khel tawh.

Ukrainian Premier League, Bundesliga leh Serie A nomawi engemawzat chawitu hian LA Galaxy chu February 2022 khan loan-in a zawm a, a thla ruk loan hun a zawh hnuin kum khat leh a chanve chhung atan contract a ziak leh tawh.

Cucho Hernández hi hming langsar tia sawi tur ni lo mah se, kum 23 mi chauh a la ni a, hmabak êng tak a nei. Mahse, MLS lam pan a thlang a, tun thlatir khan Columbus Crew a zawm.

Watford striker, Spanish club Huesca, Real Mallorca leh Getafe-ah te loan-a khel tawh striker hi Columbus Crew hian dollar maktaduai 10 bawr velin an lei a, an club player man to ber a ni - match liah goal li a khung tawh!